మున్సిపాలిటీ ఎన్నికలను ప్రశాంతంగా, పకడ్బందీగా నిర్వహించేందుకు భువనగిరి మండలం సిద్ధమవుతోంది. ఈ నేపథ్యంలో దివ్య బాల పాఠశాలలో ఏర్పాటు చేసిన డిస్ట్రిబ్యూషన్, రిసెప్షన్ కేంద్ర ఏర్పాట్లను స్థానిక సంస్థల అదనపు కలెక్టర్ భాస్కర్ రావు సోమవారం స్వయంగా పరిశీలించారు.ఎన్నికల విధుల్లో పాల్గొనే సిబ్బందికి ఎలాంటి ఇబ్బందులు తలెత్తకుండా అన్ని ఏర్పాట్లు సమగ్రంగా చేయాలని అధికారులను ఆదేశించారు. కేంద్రంలో ఏర్పాటు చేసిన టేబుల్స్, సామగ్రి పంపిణీ విధానం, భద్రతా ఏర్పాట్లు, సీసీ పర్యవేక్షణను ఆయన నిశితంగా పరిశీలించారు.

సిబ్బందికి అవసరమైన త్రాగునీరు, మరుగుదొడ్లు, విద్యుత్ సరఫరా వంటి మౌలిక వసతులు సమర్థంగా ఉన్నాయా లేదా అన్నదానిపై ప్రత్యేక దృష్టి సారించారు. ఎన్నికల ప్రక్రియలో చిన్న పొరపాటుకు కూడా తావులేకుండా ముందస్తు ప్రణాళికతో పని చేయాలని సూచించారు.ఎన్నికల నిర్వహణ విజయవంతానికి అధికారులు సమన్వయంతో పనిచేయాలని, ప్రజాస్వామ్య పండుగను ప్రశాంతంగా జరిపేందుకు ప్రతి ఒక్కరూ బాధ్యతగా వ్యవహరించాలని అదనపు కలెక్టర్ పేర్కొన్నారు.ఈ కార్యక్రమంలో సంబంధిత శాఖల అధికారులు పాల్గొన్నారు.