అక్రమ లేఅవుట్ల క్రమబద్ధీకరణ (ఎల్ఆర్ఎస్) ప్రక్రియలో రాష్ట్ర ప్రభుత్వం ప్రజలకు భారీ ఊరట కల్పించిందని చౌటుప్పల్ పురపాలక సంఘం చైర్‌పర్సన్ మొగుదాల పావని రమేష్ గౌడ్ తెలిపారు. ఎల్ఆర్ఎస్ ఫీజులు ఇతర ఛార్జీలపై 25 శాతం రాయితీ ప్రకటించిందని వెల్లడించారు. ఈ ప్రత్యేక రాయితీ సౌకర్యాన్ని 2026 మే 1 నుంచి జూలై 31 వరకు ప్రభుత్వం అందుబాటులో ఉంచిందన్నారు.అనధికార లేఅవుట్లలో ప్లాట్లు కలిగిన ప్రజలు ఈ అవకాశాన్ని వినియోగించుకుని తక్కువ వ్యయంతో తమ ఆస్తులకు ప్రభుత్వ గుర్తింపు, చట్టబద్ధత పొందవచ్చని ఆమె సూచించారు. మున్సిపల్ అడ్మినిస్ట్రేషన్, పట్టణాభివృద్ధి శాఖ జారీ చేసిన జీఓ ఎంఎస్ నెం.131 ప్రకారం ఈ ప్రక్రియ కొనసాగుతుందని తెలిపారు.

చౌటుప్పల్ పట్టణ అభివృద్ధిలో ప్రజల భాగస్వామ్యం కీలకమని పేర్కొన్న ఆమె, గడువు ముగిసేలోపు ఫీజులు చెల్లించి ప్లాట్లను క్రమబద్ధీకరించుకోవాలని ప్రజలకు విజ్ఞప్తి చేశారు.