గ్యాస్ సరఫరా సాధారణం వైపు… వినియోగదారులకు కీలక సూచనలు

నల్గొండ పట్టణంలోని గ్యాస్ వినియోగదారులకు జిల్లా LPG అసోసియేషన్ కీలక సూచనలు జారీ చేసింది.Indian Oil Corporation Limited (IOCL), Hindustan Petroleum Corporation Limited (HPCL), Bharat Petroleum Corporation Limited (BPCL) కంపెనీల తరఫున ఈ ప్రకటన విడుదలైంది. జిల్లా LPG అసోసియేషన్ అధ్యక్షుడుపగిడి గోవర్ధన్ రెడ్డి మరియు BPCL ప్రతినిధి కొలను దామోదర్ రెడ్డి సంయుక్తంగా వివరాలు వెల్లడించారు.

ప్రస్తుతం నల్గొండ పట్టణంలో వంటగ్యాస్ సరఫరా గణనీయంగా మెరుగుపడిందని వారు తెలిపారు. కొంతకాలంగా ఉన్న ఇబ్బందులు తొలగిపోతున్నాయని, త్వరలోనే సరఫరా పూర్తిగా సాధారణ స్థితికి చేరుకుంటుందని పేర్కొన్నారు. ఈ నేపథ్యంలో వినియోగదారులు ఆందోళన చెందాల్సిన అవసరం లేదని స్పష్టం చేశారు. అవసరం లేకుండా ముందస్తుగా గ్యాస్ బుకింగ్ చేయవద్దని విజ్ఞప్తి చేశారు. గ్యాస్ సిలిండర్ల పంపిణీ పూర్తిగా బుకింగ్ చేసిన సీనియారిటీ ఆధారంగా జరుగుతుందని తెలిపారు.

గ్యాస్ డెలివరీ సమయంలో వినియోగదారులు తప్పనిసరిగా కొన్ని జాగ్రత్తలు పాటించాలని సూచించారు. సిలిండర్ తీసుకునే ముందు సీలు సరిగా ఉన్నాయా, బరువు సరైనదా, ఎక్కడైనా లీకేజీ ఉందా అనే అంశాలను పూర్తిగా పరిశీలించుకోవాలని చెప్పారు. ఈ ప్రక్రియను నిర్లక్ష్యం చేయకుండా సురక్షితంగా సిలిండర్ స్వీకరించాల్సిన అవసరం ఉందన్నారు.

అదేవిధంగా, డెలివరీ బాయ్స్ ఎవరైనా నిర్ణీత ధర కంటే అదనపు డబ్బులు డిమాండ్ చేస్తే వెంటనే సంబంధిత గ్యాస్ ఏజెన్సీ యాజమాన్యానికి ఫిర్యాదు చేయాలని సూచించారు. వినియోగదారుల హక్కులను కాపాడేందుకు ఇది కీలకమని చెప్పారు. అలాగే సిలిండర్ సరైన వ్యక్తికి చేరిందని నిర్ధారించేందుకు వినియోగదారుల మొబైల్ నంబర్‌కు వచ్చే OTP లేదా DAC ను డెలివరీ సిబ్బందికి అందజేయాలని సూచించారు.

డొమెస్టిక్ గ్యాస్ సిలిండర్ల దుర్వినియోగంపై కూడా అసోసియేషన్ హెచ్చరికలు జారీ చేసింది. గృహ వినియోగం కోసం ఇచ్చే సబ్సిడీ సిలిండర్లను హోటళ్లు, హాస్టళ్లు లేదా ఇతర వాణిజ్య అవసరాలకు ఉపయోగించడం చట్టరీత్యా నేరమని స్పష్టం చేశారు. ఇలాంటి అక్రమాలను గమనించిన పక్షంలో వెంటనే పౌరసరఫరాల శాఖ అధికారులకు లేదా గ్యాస్ ఏజెన్సీకి సమాచారం ఇవ్వాలని కోరారు. ఇది సరఫరా వ్యవస్థను సక్రమంగా కొనసాగించడానికి అవసరమని పేర్కొన్నారు.

ఇక గ్యాస్ కనెక్షన్ రికార్డుల నవీకరణపై కూడా వినియోగదారులకు సూచనలు ఇచ్చారు. తమ గ్యాస్ కనెక్షన్‌లో ఉన్న చిరునామా, మొబైల్ నంబర్ వంటి వివరాలు సరిగా ఉన్నాయో లేదో వినియోగదారులు తనిఖీ చేసుకోవాలని చెప్పారు. ఏవైనా మార్పులు ఉంటే వెంటనే సంబంధిత గ్యాస్ ఏజెన్సీని సంప్రదించి సరిచేయాలని సూచించారు. అలాగే ఇంకా E-KYC పూర్తి చేయని వినియోగదారులు తమ ఆధార్ కార్డు తీసుకొని సమీప గ్యాస్ ఏజెన్సీని సంప్రదించి ఈ ప్రక్రియను త్వరగా పూర్తి చేయాలని తెలిపారు.

గ్యాస్ సరఫరా పరిస్థితి మెరుగుపడుతున్న నేపథ్యంలో వినియోగదారులు ఆందోళన చెందకుండా, అవసరమైన జాగ్రత్తలు పాటిస్తూ, నిబంధనలు అనుసరించాలని జిల్లా LPG అసోసియేషన్ పిలుపునిచ్చింది.