హైదరాబాద్, సెప్టెంబర్ 9: ప్రెస్‌ ఇన్ఫర్మేషన్‌ బ్యూరో (పీఐబీ) హైదరాబాద్‌ ఆధ్వర్యంలో గుజరాత్‌లో పర్యటిస్తున్న తెలంగాణ మీడియా ప్రతినిధుల బృందం బుధవారం ధోలేరా గ్రీన్‌ఫీల్డ్‌ ఇండస్ట్రియల్‌ స్మార్ట్‌ సిటీ, చారిత్రక లోథల్‌ పురావస్తు ప్రదేశాలను సందర్శించింది.

ధోలేరాలో స్మార్ట్‌ సిటీ సమగ్ర మాస్టర్‌ ప్లాన్, పరిశ్రమలకు అవసరమైన మౌలిక వసతులు, ప్లగ్‌అండ్‌ ప్లే పారిశ్రామిక వ్యవస్థ, లాజిస్టిక్స్‌ కనెక్టివిటీ, భవిష్యత్‌ విస్తరణ ప్రణాళికలపై అధికారులు మీడియా బృందానికి వివరించారు. ధోలేరా ఇండస్ట్రియల్‌ సిటీ డెవలప్‌మెంట్‌ లిమిటెడ్‌ (డీఐసీడీఎల్‌) జాయింట్‌ మేనేజింగ్‌ డైరెక్టర్‌ రుషిన్‌ భట్, మార్కెటింగ్‌ మేనేజర్‌ అదితి గోయక్‌ ఈ ప్రాంతంలో అందుబాటులో ఉన్న స్మార్ట్‌ యుటిలిటీస్, పెట్టుబడి అవకాశాలపై వివరించారు.

4,500 ఏళ్ల నాటి లోథల్‌ సందర్శన

అనంతరం మీడియా ప్రతినిధులు సుమారు 4,500 ఏళ్ల నాటి సింధు లోయ నాగరికతకు చెందిన లోథల్‌ పురావస్తు ప్రదేశాన్ని సందర్శించారు. పురాతన డాక్‌యార్డ్, గిడ్డంగులు, పట్టణ మురుగునీటి పారుదల వ్యవస్థలను పరిశీలించారు. అప్పటి ప్రజల పట్టణ ప్రణాళిక, ఇంజినీరింగ్‌ నైపుణ్యం, సముద్ర వాణిజ్య విధానాలపై అవగాహన పొందారు.

రూ.4,500 కోట్లతో మారిటైమ్‌ హెరిటేజ్‌ కాంప్లెక్స్‌

లోథల్‌లో అభివృద్ధి చేస్తున్న నేషనల్‌ మారిటైమ్‌ హెరిటేజ్‌ కాంప్లెక్స్‌ (ఎన్‌ఎంహెచ్‌సీ) పనులను కూడా బృందం పరిశీలించింది. కేంద్ర నౌకాశ్రయాలు, షిప్పింగ్‌, జలమార్గాల మంత్రిత్వ శాఖ సాగర్‌మాల కార్యక్రమంలో భాగంగా సుమారు 400 ఎకరాల్లో రూ.4,500 కోట్ల అంచనా వ్యయంతో ఈ ప్రాజెక్టును అభివృద్ధి చేస్తోంది.

ఈ కాంప్లెక్స్‌లో భారతదేశ 4,500 ఏళ్ల సముద్ర వారసత్వాన్ని చాటిచెప్పే మారిటైమ్‌ గ్యాలరీలు, పురాతన లోథల్‌ నమూనా, లైట్‌హౌస్‌ మ్యూజియం, 5డీ డోమ్‌ థియేటర్, ఆక్వాటిక్‌ గ్యాలరీతో పాటు తీర రాష్ట్రాల పావిలియన్లు, థీమ్‌ పార్కులు, పర్యావరణహిత రవాణా, సందర్శకుల వసతి వంటి సదుపాయాలు ఏర్పాటు చేయనున్నారు.

అభివృద్ధి–వారసత్వ పరిరక్షణకు సమన్వయం.

ధోలేరా ఆధునిక పారిశ్రామిక, మౌలిక వసతుల అభివృద్ధికి ప్రతీకగా నిలుస్తుండగా.. లోథల్‌ భారతదేశ ప్రాచీన నాగరికత, సముద్ర వారసత్వానికి అద్దం పడుతోందని అధికారులు తెలిపారు. ‘వికాస్‌ భీ.. విరాసత్‌ భీ’ లక్ష్యానికి అనుగుణంగా దేశ అభివృద్ధి, చారిత్రక వారసత్వ పరిరక్షణకు కేంద్ర ప్రభుత్వం ప్రాధాన్యం ఇస్తున్న తీరును ఈ పర్యటన ద్వారా మీడియా ప్రతినిధులు ప్రత్యక్షంగా తెలుసుకున్నారు.