చౌటుప్పల్ పట్టణంలోని వలిగొండ రోడ్డులో గల హెచ్‌ఎండీఏ (HMDA) వెంచర్‌లోని ఓ ఇంట్లో గుట్టుచప్పుడు కాకుండా సాగుతున్న పేకాట స్థావరంపై పోలీసులు శుక్రవారం రాత్రి మెరుపు దాడి చేశారు. ఈ దాడిలో నలుగురు వ్యక్తులను అదుపులోకి తీసుకోగా, వారి వద్ద నుంచి భారీగా నగదు, సెల్‌ఫోన్లను స్వాధీనం చేసుకున్నారు.​ వలిగొండ రోడ్డులోని సురేష్ అనే వ్యక్తి ఇంట్లో కొందరు వ్యక్తులు జూదం ఆడుతున్నట్లు ఎస్‌హెచ్‌ఓ (SHO) కు అందిన విశ్వసనీయ సమాచారం మేరకు, సబ్ ఇన్‌స్పెక్టర్ బి. అజయ్ భార్గవ్ తన సిబ్బందితో కలిసి రాత్రి 9:30 గంటల సమయంలో తనిఖీలు చేపట్టారు. ఈ తనిఖీల్లో పేకాట ఆడుతూ నలుగురు వ్యక్తులు రెడ్ హ్యాండెడ్‌గా పట్టుబడ్డారు.

​పట్టుబడ్డ వారు ​బొదుల శ్యామ్ (లింగారెడ్డిగూడెం) ​సుక్క నరసింహ (కాటమయ్య కాలనీ) ​ఉష్కాగుల సురేష్ (కేపీఆర్ నగర్) ​నందగిరి నరేష్ (రామ్ నగర్ కాలనీ) నిందితుల నుంచి రూ. 51,200 నగదుతో పాటు, 4 సెల్‌ఫోన్లు, 2 సెట్ల పేక ముక్కలను పోలీసులు స్వాధీనం చేసుకున్నారు. ఈ మేరకు కేసు నమోదు చేసి దర్యాప్తు చేస్తున్నట్లు చౌటుప్పల్ ఇన్‌స్పెక్టర్ జి. మన్మధ కుమార్ తెలిపారు. చట్ట వ్యతిరేక కార్యకలాపాలకు పాల్పడితే కఠిన చర్యలు తప్పవని ఆయన హెచ్చరించారు.