మధ్యాహ్నం చైర్మన్, వైస్ చైర్మన్ ఎన్నిక

చౌటుప్పల్ మున్సిపాలిటీ నూతన పాలకవర్గం నేడు అధికారికంగా బాధ్యతలు స్వీకరించనుంది. ప్రజల ఆశలు, అభిలాషల మధ్య మున్సిపల్ కార్యాలయం వేడుకలకు సన్నద్ధమైంది. ప్రమాణ స్వీకారోత్సవం, అనంతరం చైర్మన్–వైస్ చైర్మన్ ఎన్నికల నిర్వహణకు అధికారులు పకడ్బందీ ఏర్పాట్లు పూర్తి చేశారు.మున్సిపల్ కమిషనర్ జి. వెంకటరామ్ రెడ్డి వివరాల ప్రకారం, సోమవారం ఉదయం 11 గంటలకు ఆర్డీవో శేఖర్ రెడ్డి పర్యవేక్షణలో నూతనంగా ఎన్నికైన కౌన్సిలర్లు ప్రమాణ స్వీకారం చేయనున్నారు. ప్రజాస్వామ్య వ్యవస్థలో కీలక ఘట్టమైన ఈ కార్యక్రమానికి అన్ని పరిపాలనా ఏర్పాట్లు సిద్ధం చేశారు.

అనంతరం మధ్యాహ్నం 12:30 గంటలకు మున్సిపల్ చైర్మన్, వైస్ చైర్మన్ ఎన్నిక నిర్వహించనున్నారు. ఎన్నికల ప్రక్రియ పారదర్శకంగా, నిబంధనల ప్రకారం సజావుగా సాగేందుకు ప్రత్యేక చర్యలు తీసుకున్నట్లు కమిషనర్ స్పష్టం చేశారు.కార్యక్రమం ప్రశాంత వాతావరణంలో జరగేందుకు భద్రతా ఏర్పాట్లు, సిబ్బంది నియామకం, సమావేశ మందిర ఏర్పాట్లు పూర్తిచేసినట్లు తెలిపారు. రాజకీయంగా ఆసక్తికరంగా మారిన ఈ ఎన్నికల ప్రక్రియపై పట్టణ ప్రజలు ఉత్కంఠగా ఎదురు చూస్తున్నారు.