మున్సిపల్ ఎన్నికల నిర్వహణలో భాగంగా సోమవారం భువనగిరి మున్సిపల్ కార్యాలయంలో భద్రపరచిన పోలింగ్ సామగ్రిని స్థానిక సంస్థల అదనపు కలెక్టర్ భాస్కర్ రావు స్వయంగా పరిశీలించారు. ఎన్నికలు ప్రశాంతంగా, పారదర్శకంగా నిర్వహించేందుకు అన్ని ఏర్పాట్లు సమర్ధంగా ఉండాలని అధికారులకు స్పష్టం చేశారు.పోలింగ్ కేంద్రాలకు పంపిణీ చేయనున్న బ్యాలెట్ బాక్సులు, సీలింగ్ విధానం, సీల్ వేయడం–తీయడం ప్రక్రియ, వివిధ ఫారాలు, స్టేషనరీతో పాటు ఇతర ఎన్నికల సామగ్రి సిద్ధంగా ఉండేలా చర్యలు తీసుకోవాలని ఆదేశించారు. ప్రతి పోలింగ్ కేంద్రానికి అవసరమైన సామగ్రి సమయానికి చేరేలా కచ్చితమైన ప్రణాళికతో పంపిణీ చేయాలని సూచించారు.ఎన్నికల విధుల్లో పాల్గొనే అధికారులు, సిబ్బంది ఎన్నికల నియమావళిని కచ్చితంగా పాటించాలని, ఎలాంటి పొరపాట్లు జరగకుండా అప్రమత్తంగా విధులు నిర్వహించాలని భాస్కర్ రావు అన్నారు. చిన్న నిర్లక్ష్యం కూడా ఎన్నికల ప్రక్రియపై ప్రభావం చూపుతుందని, అందువల్ల ప్రతి దశలో జాగ్రత్త అవసరమని హెచ్చరించారు.ఈ పరిశీలన కార్యక్రమంలో మున్సిపల్ కమిషనర్ రామలింగం, ఎన్నికల విభాగ సిబ్బంది తదితరులు పాల్గొన్నారు.