సూర్యాపేట స్థానిక ప్రధాన ప్రతినిధి :

ప్రముఖ తెలుగు దినపత్రిక భారత శక్తి 2026 నూతన సంవత్సర క్యాలెండర్‌ను గురువారం సూర్యాపేట జిల్లా కలెక్టరేట్ కార్యాలయంలో సీనియర్ జర్నలిస్టు, గోల్డ్ మెడలిస్ట్ డాక్టరేట్ అవార్డు గ్రహీత డాక్టర్ బంటు కృష్ణ, భారత శక్తి సూర్యాపేట జిల్లా ప్రతినిధి, సూర్యాపేట ప్రెస్ క్లబ్ ప్రధాన కార్యదర్శి కందుకూరి యాదగిరితో పాటు పలువురు జర్నలిస్టులు ఆవిష్కరించారు. ఈ సందర్భంగా డాక్టర్ బంటు కృష్ణ మాట్లాడుతూ ప్రభుత్వానికి, ప్రజలకు వారధిగా పనిచేస్తున్న సమాచార పౌర సంబంధాల శాఖ రాష్ట్రంలోని ప్రతి జర్నలిస్టు సంక్షేమం కోసం మరింత ఆలోచన చేయాల్సిన అవసరం ఉందన్నారు. ప్రజా సమస్యలను ప్రభుత్వం దృష్టికి తీసుకెళ్లడంలో భారత శక్తి దినపత్రిక ప్రత్యేక స్థానాన్ని సంపాదించుకొని ప్రజలకు చేరువైందని పేర్కొన్నారు. నాణ్యమైన కథనాలతో పత్రిక విలువలకు అనుగుణంగా భారత శక్తి పత్రిక కొనసాగుతుందని అన్నారు. అనంతరం కందుకూరి యాదగిరి మాట్లాడుతూ పత్రిక ప్రారంభించిన నాటి నుంచి రెండు దశాబ్దాలుగా అన్ని వర్గాల ప్రజల సమస్యలను ప్రభుత్వం దృష్టికి తీసుకెళ్తూ, ప్రభుత్వ పథకాలను ప్రజలకు చేరవేస్తూ భారత శక్తి దినపత్రిక తన నైతిక బాధ్యతలను నిర్వర్తిస్తోందని తెలిపారు. భారత శక్తి పత్రికను ఆదరిస్తున్న ప్రతి ఒక్కరికీ ప్రత్యేక కృతజ్ఞతలు తెలిపారు. ఈ క్యాలెండర్ ఆవిష్కరణ కార్యక్రమంలో పలువురు జర్నలిస్టులు పాల్గొన్నారు.