నారాయణఖేడ్ నియోజకవర్గంలోని మానూర్ మండలం పరిధిలోని బోరంచ గ్రామ శివారులో మంజీర నది ఒడ్డున వెలసిన శ్రీ నల్లపోచమ్మ అమ్మవారి ఆలయంలో ఆదివారం భక్తి శ్రద్ధలతో ప్రత్యేక పూజలు నిర్వహించారు. ఆలయ ప్రధాన అర్చకులు శ్రీకాంత్ స్వామి అమ్మవారికి అభిషేకం చేసి పట్టువస్త్రాలతో అలంకరించి ప్రాతఃకాల పూజలను ఘనంగా నిర్వహించారు. ఈ సందర్భంగా భక్తులు పెద్ద సంఖ్యలో హాజరై అమ్మవారిని దర్శించుకుని మొక్కులు చెల్లించుకున్నారు. అర్చకులు మాట్లాడుతూ మారుమూల ప్రాంతంలో ఉన్నప్పటికీ ఈ ఆలయం ఎంతో ప్రసిద్ధి చెందిందని, భక్తులు విశ్వాసంతో ప్రార్థిస్తే అమ్మవారు వారి కోరికలు నెరవేర్చుతారని తెలిపారు. మంజీర నది ఒడ్డున ఉన్న ఈ ఆలయం సమీప గ్రామాలతో పాటు దూర ప్రాంతాల భక్తులను ఆకర్షిస్తూ ఆధ్యాత్మిక కేంద్రంగా నిలుస్తోందని పేర్కొన్నారు.