అవాంఛనీయ సంఘటనలు జరగకుండా కట్టుదిట్టమైన భద్రత: ఎస్పీ అక్షాంష్ యాదవ్

వినాయక నిమజ్జన ఉత్సవాలను ప్రశాంత వాతావరణంలో, ఎలాంటి అవాంఛనీయ సంఘటనలు జరగకుండా వైభవంగా నిర్వహించేందుకు అన్ని రకాల భద్రతా ఏర్పాట్లు పూర్తి చేసినట్లు యాదాద్రి భువనగిరి జిల్లా ఎస్పీ అక్షాంష్ యాదవ్ తెలిపారు. మండల పరిధిలోని చిన్నకొండూరు గ్రామంలోని బొమ్మల చెరువు వద్ద చేపట్టిన నిమజ్జన ఏర్పాట్లను సోమవారం ఆయన చౌటుప్పల్ డీఎస్పీ పి. మధుసూదన్ రెడ్డితో కలిసి క్షేత్రస్థాయిలో పరిశీలించారు.

​ఈ సందర్భంగా ఎస్పీ మాట్లాడుతూ... భక్తులకు ఎలాంటి అసౌకర్యం కలగకుండా చెరువు వద్ద అవసరమైన మరమ్మతు పనులు, మౌలిక సదుపాయాలు, లైటింగ్ ఏర్పాట్లను వేగవంతం చేయాలని అధికారులను ఆదేశించారు. నిమజ్జన సమయంలో ట్రాఫిక్ సమస్యలు తలెత్తకుండా, శాంతిభద్రతల పరిరక్షణకు కట్టుదిట్టమైన పోలీస్ బందోబస్తు ఏర్పాటు చేస్తున్నట్లు పేర్కొన్నారు.

​ఈ తనిఖీ కార్యక్రమంలో చౌటుప్పల్ సీఐ జి. మన్మధ కుమార్, మున్సిపల్ కమిషనర్ వెంకటేశ్వర నాయక్, గ్రామ పంచాయతీ అధికారులు, ఆర్ అండ్ బీ, వైద్య, విద్యుత్ శాఖల సిబ్బంది తదితరులు పాల్గొన్నారు.