భక్తిశ్రద్ధలతో వినాయక నవరాత్రి ఉత్సవాలు

విశేషంగా పాల్గొన్న గ్రామ ప్రజలు, భక్తులు

చిన్న కొండూరు గ్రామంలో గౌరీపుత్ర యూత్ అసోసియేషన్ ఆధ్వర్యంలో కులమతాలకు అతీతంగా నిర్వహించిన అన్నదాన కార్యక్రమం ఘనంగా జరిగింది. వినాయక నవరాత్రి ఉత్సవాలను పురస్కరించుకుని ఏర్పాటు చేసిన ఈ కార్యక్రమంలో గ్రామ ప్రజలు, భక్తులు పెద్ద సంఖ్యలో పాల్గొని స్వామివారిని దర్శించుకుని అన్నప్రసాదాన్ని స్వీకరించారు.​ఈ సందర్భంగా పలువురు దాతలు తమవంతు సహకారాన్ని అందించి సేవాభావాన్ని చాటుకున్నారు. విగ్రహ దాతలుగా కడారి సత్యనారాయణ–లత, కడారి లింగస్వామి–శ్వేత, లడ్డూ దాతగా మహ్మద్ మజీద్–సబేరా వ్యవహరించగా.. అన్నదాన కార్యక్రమానికి గరిశే లక్ష్మయ్య–ఆండాలు, గరిశే శ్రీను–శ్రీలత, సాయికిరణ్ సహకారం అందించారు.​ఈ సందర్భంగా నిర్వాహకులు మాట్లాడుతూ.. ఆకలితో ఉన్న వారికి అన్నం పెట్టడమే మిన్నయని, గ్రామంలో ఐక్యత, సోదరభావాన్ని చాటేందుకే కులమతాలకు అతీతంగా ఈ కార్యక్రమాన్ని చేపట్టినట్లు తెలిపారు. గౌరీపుత్ర యూత్ సభ్యుల సమన్వయంతో కార్యక్రమం విజయవంతం కాగా, దాతలను గ్రామస్థులు అభినందించారు.