ఆర్‌డీఓ కార్యాలయంలో వినతిపత్రం అందజేసిన ఆర్‌టీఐ జేఏసీ నాయకులు

చౌటుప్పల్ డివిజన్ పరిధిలోని అన్ని ప్రభుత్వ కార్యాలయాల్లో సమాచార హక్కు చట్టం (ఆర్‌టీఐ) బోర్డులు, సిటిజన్ చార్టర్, పాలకవర్గ సభ్యుల వివరాల బోర్డులను వెంటనే ఏర్పాటు చేయాలని ఆర్‌టీఐ జేఏసీ నాయకులు డిమాండ్ చేశారు. సోమవారం ఆర్‌డీఓ కార్యాలయంలో నిర్వహించిన 'ప్రజావాణి' కార్యక్రమంలో జేఏసీ ప్రతినిధులు గుంటోజు అంజయ్య చారి, మహమ్మద్ గౌస్, శ్యామ్ కుమార్ హాజరై అధికారులకు వినతిపత్రం అందజేశారు.​ఈ సందర్భంగా వారు మాట్లాడుతూ... పారదర్శక పాలన అందించడంలో భాగంగా ప్రజలకు సమాచార హక్కు చట్టం వివరాలు, కార్యాలయాల సేవలకు సంబంధించిన సిటిజన్ చార్టర్ స్పష్టంగా అందుబాటులో ఉండాలన్నారు. అదేవిధంగా, ప్రజాసౌకర్యార్థం ప్రతి ప్రభుత్వ అధికారి తప్పనిసరిగా తమ స్థానిక హెడ్‌క్వార్టర్స్‌ పరిధిలోనే నివాసం ఉండాలని, నిరంతరం ప్రజలకు అందుబాటులో ఉండాలని కోరారు. నిర్లక్ష్యం వహించే అధికారులపై చర్యలు తీసుకోవాలని విజ్ఞప్తి చేశారు.