సూర్యాపేటలో తెలంగాణ రాజ్యాధికార పార్టీ రాష్ట్ర ప్రధాన కార్యదర్శి వట్టె జానయ్య యాదవ్ ఆరోపణలు

సూర్యాపేటలో నిర్వహించిన పాత్రికేయ సమావేశంలో తెలంగాణ రాజ్యాధికార పార్టీ రాష్ట్ర ప్రధాన కార్యదర్శి, ఉమ్మడి నల్గొండ జిల్లా బాధ్యుడు వట్టె జానయ్య యాదవ్ బీసీ, ఎస్సీ, ఎస్టీ, మైనారిటీ వర్గాలపై జరుగుతున్న రాజకీయ అన్యాయాలపై తీవ్రంగా స్పందించారు. సూర్యాపేట పురపాలక సంస్థ పరిధిలో కాంగ్రెస్, బిఆర్ఎస్ పార్టీలు కలిసి బీసీ, ఎస్సీ, ఎస్టీ, మైనారిటీలను రాజకీయంగా అణచివేస్తున్నాయని ఆరోపించారు. సంవత్సరాల తరబడి పార్టీ కోసం పనిచేసిన కార్యకర్తలకు సమయం వచ్చినప్పుడు పదవులు ఇవ్వకుండా అగ్రవర్ణ కాంట్రాక్టర్లు, ప్రభావశీల వర్గాలకు అవకాశాలు కల్పిస్తున్నారని విమర్శించారు.

పురపాలక సంస్థలో గెలిచిన బీసీ ప్రజాప్రతినిధులకు తగిన గౌరవం, అవకాశాలు ఎందుకు ఇవ్వడంలేదని ప్రశ్నించారు. నలభై రెండు శాతం రిజర్వేషన్లు ఇస్తామని హామీ ఇచ్చిన కాంగ్రెస్ పార్టీ ఆ మాట నిలబెట్టుకుందా అని నిలదీశారు. బిఆర్ఎస్, కాంగ్రెస్ పార్టీలు పరస్పరం విమర్శలు చేసుకుంటున్నట్లు నటిస్తూ కీలక సందర్భాల్లో ఒకటై బీసీల ఎదుగుదలను అడ్డుకుంటున్నాయని ఆరోపించారు. పదేళ్లపాటు జరిగిన దోపిడీపై ప్రశ్నించని వారు ఇప్పటికీ రాజకీయ లాభాల కోసం కలిసి పనిచేస్తున్నారని అన్నారు.

తెలంగాణ రాజ్యాధికార పార్టీ తొంభై ఐదు శాతం ప్రజావర్గాలకు రాజ్యాధికారం సాధించడమే లక్ష్యంగా పనిచేస్తోందని స్పష్టం చేశారు. బీసీ, ఎస్సీ, ఎస్టీ, మైనారిటీ సోదరులు తమ రాజకీయ భవిష్యత్తుపై ఆలోచించి సరైన నిర్ణయం తీసుకోవాలని విజ్ఞప్తి చేశారు. “మార్పు రావాలని కోరుకోవడం సరిపోదు… మనం మారితేనే మన పరిస్థితులు మారుతాయి” అని పేర్కొన్నారు.

ఈ కార్యక్రమంలో సూర్యాపేట జిల్లా అధ్యక్షుడు మామిడి అంజయ్య, జిల్లా మహిళా అధ్యక్షురాలు కొన్నె మంజుల గౌడ్, కార్యదర్శి నారాయణ దాసు కవిత, పట్టణ కార్యదర్శి ఏశబోయిన మల్లేష్, ఆత్మకూరు మండల అధ్యక్షుడు బొల్లె సైదులు, పెన్పహాడ్ మండల అధ్యక్షుడు ఆవుల అంజయ్య, మాజీ మార్కెట్ డైరెక్టర్ మురళి, వట్యాల శేఖర్, చామల, సుమన్, దీపమాల, బొల్లెద్దు అనిత, గట్టు గోపి, రఘు మోహన్, వంశీ, సురేష్, రంప శ్రీదేవి తదితరులు పాల్గొన్నారు.