నారాయణఖేడ్ నియోజకవర్గంలోని శంకరంపేట మండలం చిలపల్లి గ్రామంలో జరిగిన భారీ చోరీ ఘటనపై ఎమ్మెల్యే డాక్టర్ పట్లోళ్ల సంజీవరెడ్డి తీవ్ర దిగ్భ్రాంతి వ్యక్తం చేశారు. గ్రామానికి చెందిన రాములు ఇంట్లో ఎవరూ లేని సమయంలో దుండగులు చొరబడి పెద్ద మొత్తంలో బంగారు ఆభరణాలు మరియు నగదును అపహరించిన విషయం తెలుసుకున్న వెంటనే ఎమ్మెల్యే శుక్రవారం బాధిత కుటుంబాన్ని పరామర్శించేందుకు వారి నివాసానికి చేరుకున్నారు. కుటుంబ సభ్యులకు ధైర్యం చెప్పి జరిగిన ఘటనపై పూర్తి వివరాలు అడిగి తెలుసుకున్నారు. ఈ సందర్భంగా ఎమ్మెల్యే మాట్లాడుతూ ప్రజలు కష్టపడి సంపాదించిన ఆస్తిని దోచుకోవడం అమానుషమని అన్నారు. ఈ ఘటనపై పోలీసులు వెంటనే స్పందించి లోతైన విచారణ చేపట్టాలని, క్లూస్ టీమ్ మరియు డాగ్ స్క్వాడ్ సహాయంతో ఆధారాలు సేకరించి నిందితులను త్వరగా పట్టుకోవాలని అధికారులను ఆదేశించారు. మండల పరిధిలో రాత్రిపూట పోలీస్ గస్తీని పెంచడంతో పాటు అనుమానితులపై ప్రత్యేక నిఘా ఉంచాలని సూచించారు. నిరుపేద కుటుంబానికి జరిగిన ఈ నష్టాన్ని ప్రభుత్వం దృష్టికి తీసుకెళ్లి వారికి అన్ని విధాలా అండగా ఉంటామని ఎమ్మెల్యే భరోసా ఇచ్చారు. ఈ కార్యక్రమంలో స్థానిక ప్రజాప్రతినిధులు, నాయకులు, గ్రామ పెద్దలు మరియు గ్రామస్థులు పాల్గొన్నారు.