అవయవ దానానికి అంగీకారం తెలిపిన డిఎస్వి శర్మ – సమాజానికి స్ఫూర్తిదాయకం

స్పందన శరీర, అవయవ దాన సంస్థ ఆధ్వర్యంలో సోమవారం పట్టణానికి చెందిన విశ్రాంత జిల్లా పరిషత్ ఉప ముఖ్య కార్యనిర్వహణాధికారి డిఎస్వి శర్మ తమ అవయవ దాన అంగీకార పత్రాన్ని సంస్థ ప్రతినిధులకు అందజేశారు.

ఈ సందర్భంగా స్పందన స్వచ్ఛంద సంస్థ గౌరవ అధ్యక్షుడు గుండా రమేష్ మాట్లాడుతూ డిఎస్వి శర్మ విశాల దృక్పథంతో, మానవీయ కోణంలో పవిత్ర ఆశయంతో అవయవ దాతగా ముందుకు రావడం సమాజానికి స్ఫూర్తిదాయకమని పేర్కొన్నారు. అవయవ దానం ఒక అశ్వమేధ యాగంతో సమానమని, ఈ ముందడుగు భావితరాలకు ప్రేరణగా నిలుస్తుందని తెలిపారు.

సంస్థ అధ్యక్షుడు జి రమేష్, కార్యదర్శి మిట్ట కోల కోటయ్య, కోశాధికారి హెచ్ పిచ్చిరెడ్డి, సభ్యుడు రౌతు రమేష్ అంగీకార పత్రాన్ని స్వీకరిస్తూ డిఎస్వి శర్మ సహృదయతను, సత్సంకల్పాన్ని అభినందించారు.

ఈ సందర్భంగా శర్మ మాట్లాడుతూ అవయవ దానం ద్వారా మనిషి మరణానంతరం కూడా ఇతరులలో జీవిస్తూ తన జన్మను సార్థకం చేసుకోవచ్చని తెలిపారు. అలాగే ఇది వైద్య విద్యార్థులకు శాస్త్రీయ పరిశోధనలకు ఉపయోగపడే విధంగా ఉంటుందని అభిప్రాయపడ్డారు.