ఆర్టీసీ కార్మికుల సమ్మెకు బహుజన సమాజ్ పార్టీ సంపూర్ణ మద్దతు ప్రకటించింది. కార్మికుల న్యాయమైన డిమాండ్లను వెంటనే పరిష్కరించాలని డిమాండ్ చేస్తూ, రాష్ట్ర ఆదేశాల మేరకు ఈ మద్దతు తెలిపినట్లు పార్టీ నాయకులు పేర్కొన్నారు. ఈ సందర్భంగా జిల్లా ఉపాధ్యక్షులు భోర్గి భీమన్న, నారాయణఖేడ్ నియోజకవర్గ అధ్యక్షులు అనుముల తుకారం మాట్లాడుతూ ఆర్టీసీ కార్మికులు తమ హక్కుల కోసం చేస్తున్న సమ్మె పూర్తిగా న్యాయసమ్మతమని, సంవత్సరాలుగా పెండింగ్‌లో ఉన్న సమస్యలను ప్రభుత్వం నిర్లక్ష్యం చేయడం బాధాకరమని అన్నారు. కార్మికులకు తగిన వేతనాలు, ఉద్యోగ భద్రత, పెన్షన్ వంటి కీలక అంశాలను వెంటనే పరిష్కరించాలని ప్రభుత్వాన్ని కోరుతూ, ప్రజలకు సేవలు అందిస్తున్న ఆర్టీసీ కార్మికులను ఇబ్బందులకు గురిచేయడం సరికాదని పేర్కొన్నారు. ప్రభుత్వం తక్షణమే స్పందించి కార్మికులతో చర్చలు జరిపి సమస్యలను పరిష్కరించకపోతే, బహుజన సమాజ్ పార్టీ తరఫున ఉద్యమాన్ని మరింత ఉధృతం చేస్తామని హెచ్చరించారు. ఈ కార్యక్రమంలో కాశయ్య, రాజు, దినేష్, శరణప్ప, సాయిలు తదితరులు పాల్గొన్నారు.