రాష్ట్ర ప్రభుత్వం అన్ని వర్గాల సంక్షేమానికి కట్టుబడి ఉందని, పేదల అభ్యున్నతే లక్ష్యంగా పలు సంక్షేమ పథకాలను సమర్థవంతంగా అమలు చేస్తోందని రాష్ట్ర వైద్య ఆరోగ్యశాఖ మంత్రి దామోదర్ రాజనర్సింహ తెలిపారు. ప్రజా పాలన–ప్రగతి ప్రణాళిక కార్యక్రమంలో భాగంగా ఆందోల్ మండలం అల్మాయిపేట గ్రామంలో నిర్వహించిన గ్రామసభలో ఆయన పాల్గొని మాట్లాడారు. గ్రామసభ తెలంగాణ గీతంతో ప్రారంభమై ముఖ్యమంత్రి సందేశాన్ని చదివి వినిపించగా, అధికారులు గ్రామంలో అమలు చేస్తున్న పథకాలు, అభివృద్ధి కార్యక్రమాల వివరాలను ప్రజలకు తెలియజేశారు.ఈ సందర్భంగా మంత్రి మాట్లాడుతూ ప్రభుత్వం అమలు చేస్తున్న సంక్షేమ పథకాలు అర్హులందరికీ చేరేలా కృషి చేస్తున్నామని, మహిళల ఆరోగ్యాన్ని దృష్టిలో ఉంచుకొని ప్రతి గ్రామంలో 30 రకాల వైద్య పరీక్షలు నిర్వహిస్తున్నామని తెలిపారు. గ్రామంలోని స్వయం సహాయక సంఘాలకు రూ.3.50 కోట్ల రుణాలు, రూ.2.50 లక్షల వడ్డీ సబ్సిడీ అందించామని చెప్పారు.ఇందిరమ్మ ఇళ్లు, రైతు భరోసా, రైతు భీమా, ఉచిత బస్సు ప్రయాణం, 200 యూనిట్ల ఉచిత విద్యుత్ వంటి పథకాలు ప్రజలకు ఎంతో ఉపయోగపడుతున్నాయని పేర్కొన్నారు.అల్మాయిపేటలో కొత్త కాలనీ ఏర్పాటు చేస్తే రహదారులు, నీటి ట్యాంకులు, విద్యుత్ సదుపాయాలు వంటి మౌలిక వసతులు కల్పిస్తామని హామీ ఇచ్చారు. అలాగే హైవే నుండి అల్మాయిపేట–కొన్యాల వరకు బీటీ రహదారి, సీసీ రోడ్లు, అండర్ డ్రైనేజీ పనులను మంజూరు చేస్తామని తెలిపారు. మంజూరైన ఇందిరమ్మ ఇళ్ల నిర్మాణాన్ని పూర్తి చేయాలని లబ్ధిదారులకు సూచిస్తూ, అవసరమైన సహాయం అందిస్తామని చెప్పారు.ఆందోల్ ప్రాంతంలో విద్యా, పారిశ్రామిక అభివృద్ధి కోసం చర్యలు తీసుకుంటున్నామని, త్వరలో ఫార్మసీ కళాశాల ఏర్పాటు చేయడంతో పాటు సంగుపేట గుట్ట వద్ద పరిశ్రమలు స్థాపించనున్నట్లు వెల్లడించారు.పేదలకు చెందిన అసైన్డ్ భూముల సమస్యను పరిష్కరించి వాటిని అసలు లబ్ధిదారులకు తిరిగి అందజేస్తామని స్పష్టం చేశారు.జిల్లా కలెక్టర్ ప్రావీణ్య మాట్లాడుతూ ప్రజా పాలన కార్యక్రమాల్లో ప్రజలు చురుకుగా పాల్గొనాలని, మహిళా శక్తి పథకం ద్వారా మహిళలను ఆర్థికంగా బలోపేతం చేస్తున్నామని తెలిపారు. అలాగే కొత్త సంక్షేమ పథకాలను త్వరలో అమలు చేయనున్నట్లు చెప్పారు. అనంతరం ఇందిరమ్మ ఇల్లు నిర్మాణానికి మంత్రి, కలెక్టర్ కలిసి శంకుస్థాపన చేశారు. కార్యక్రమంలో అధికారులు, ప్రజాప్రతినిధులు, గ్రామ ప్రజలు పాల్గొన్నారు.