చిత్తశుద్ధితో పనిచేసి యూనివర్సిటీ కి మంచి పేరు తీసుకురావాలి: వీసీ ప్రొ. ఘంటా చక్రపాణి

స్థానికం ప్రతినిధి జూబ్లీహిల్స్:

డా. బి.ఆర్. అంబేద్కర్ సార్వత్రిక విశ్వవిద్యాలయ నూతన సంవత్సర (2026) క్యాలెండర్ మరియు డైరీలను విశ్వవిద్యాలయ ఉపకులపతి ఆచార్య ఘంటా చక్రపాణి ఘనంగా ఆవిష్కరించారు. గురువారం యూనివర్సిటీ జరిగిన కార్యక్రమంలో రిజిస్ట్రార్ డా. ఎల్. విజయా కృష్ణారెడ్డితో కలిసి ఆయన పాల్గొన్నారు.

నాణ్యమైనవిద్యే లక్ష్యం: ఈ సందర్భంగా వీసీ ప్రొ. ఘంటా చక్రపాణి మాట్లాడుతూ.. నూతన సంవత్సరంలో ఉద్యోగులందరూ మరింత జవాబుదారీతనంతో, చిత్తశుద్ధితో పనిచేయాలని పిలుపునిచ్చారు.

విద్యార్థులకు నాణ్యమైన విద్యను అందించడమే లక్ష్యంగా ముందుకు సాగాలని సూచించారు. అనంతరం అధ్యాపక, అధ్యపకేతర సిబ్బందికి, విద్యార్థులకు ఆయన నూతన సంవత్సర శుభాకాంక్షలు తెలియజేశారు.

రిజిస్ట్రార్ డా. ఎల్వీకే రెడ్డి మాట్లాడుతూ.. విద్యార్థి సేవలకు అత్యధిక ప్రాధాన్యత ఇవ్వాలని, వర్సిటీ అభివృద్ధిలో ప్రతి ఒక్కరూ భాగస్వాములు కావాలని కోరారు.

వీసీ, రిజిస్ట్రార్లకు ఘన సన్మానం: దీర్ఘకాలికంగా పెండింగ్‌లో ఉన్న ఉద్యోగుల సమస్యలను పరిష్కరించినందుకు గాను, వివిధ ఉద్యోగ సంఘాల ప్రతినిధులు వీసీ ప్రొ. ఘంటా చక్రపాణిని, రిజిస్ట్రార్ డా. ఎల్వీకే రెడ్డిని ఘనంగా సన్మానించారు.

పాల్గొన్న ప్రముఖులు: ఈ కార్యక్రమంలో అకడమిక్ డైరెక్టర్ ప్రొ. జి. పుష్పా చక్రపాణి, వివిధ విభాగాల డైరెక్టర్లు, డీన్లు, హెడ్లు పాల్గొన్నారు. ఉద్యోగ సంఘాల ప్రతినిధులు కాంతం ప్రేమ్ కుమార్, ఎన్.సి. వేణుగోపాల్, విశ్వనాథ్, భరత్ రెడ్డి, డా. యకేష్ దైదా మరియు ఇతర సిబ్బంది ఈ వేడుకలో భాగస్వాములయ్యారు.