అల్లాదుర్గ్ మండలంలోని అన్ని గ్రామ పంచాయతీలలో రోడ్డు భద్రతపై గ్రామసభలు నిర్వహించబడినవి. ప్రజలకు రోడ్డు భద్రతపై అవగాహన కల్పించేందుకు పోలీస్ సిబ్బంది మరియు స్పెషల్ ఆఫీసర్లు పాల్గొని సూచనలు అందించారు. గడి పెద్దాపూర్ గ్రామపంచాయతీలో “99 డేస్ యాక్షన్ ప్లాన్”లో భాగంగా ప్రత్యేక గ్రామసభ నిర్వహించగా, సర్పంచ్ హరికృష్ణ అధ్యక్షత వహించారు. ఈ సందర్భంగా గ్రామ రోడ్డు భద్రత కమిటీని ఏర్పాటు చేసి, సర్పంచ్‌తో పాటు మొత్తం పది మంది సభ్యులను నియమించారు. అనంతరం మండలంలోని అన్ని గ్రామ పంచాయతీల పోలీస్ సిబ్బంది మరియు స్పెషల్ ఆఫీసర్లతో వాట్సాప్ కాల్ ద్వారా రోడ్డు భద్రత ప్రతిజ్ఞ చేయించారు. రోడ్డు ప్రమాదాలు నివారించేందుకు తీసుకోవాల్సిన జాగ్రత్తలను వివరించడంతో పాటు, చిన్నచిన్న నిర్లక్ష్యాల వల్ల జరిగే ప్రమాదాలను టీవీ స్క్రీన్ ద్వారా చూపించి ప్రజల్లో చైతన్యం కల్పించారు. కార్యక్రమం అనంతరం గ్రామంలోని రోడ్డు గుంతలను పూడ్చడం, రహదారులకు అడ్డంగా ఉన్న చెట్టు కొమ్మలను తొలగించడం వంటి చర్యలు గ్రామపంచాయతీ సిబ్బంది సహకారంతో చేపట్టి రహదారులను సురక్షితంగా మార్చారు. ఈ కార్యక్రమానికి గ్రామస్థుల నుంచి మంచి స్పందన లభించింది.