​మున్సిపల్ చైర్‌పర్సన్‌కు వినతిపత్రం అందజేసిన గుడి నిర్మాణ కమిటీ

చౌటుప్పల్ మున్సిపాలిటీ పరిధిలోని పాత ఫర్నిచర్ షాపుల వల్ల తీవ్ర ఇబ్బందులు ఎదుర్కొంటున్న విశ్వకర్మ కుటుంబాలకు తక్షణమే న్యాయం చేయాలని శ్రీ గోవిందమ్మ సమేత పోతులూరి వీరబ్రహ్మేంద్రస్వామి గుడి నిర్మాణ కమిటీ ప్రధాన కార్యదర్శి నాగవాచారి డిమాండ్ చేశారు. మున్సిపల్ చైర్‌పర్సన్ మొగుదాల పావని రమేష్‌గౌడ్ కు వినతిపత్రాన్ని అందజేశారు.​ఈ సందర్భంగా నాగవాచారి మాట్లాడుతూ.. నేటి ఆధునిక ప్రపంచంలో చేతివృత్తులు రోజురోజుకూ కనుమరుగైపోతున్నాయని ఆవేదన వ్యక్తం చేశారు. ఇలాంటి క్లిష్ట పరిస్థితుల్లోనూ తమ కులవృత్తిని కాపాడుకోవడానికి విశ్వకర్మలు ఎంతో కృషి చేస్తున్నారని కొనియాడారు. వారి శ్రమను, ఆరాటాన్ని ప్రజాప్రతినిధులు, మేధావులు, కుల పెద్దలు గుర్తించి, ప్రతి ఒక్కరూ వారికి సహాయ సహకారాలు అందించాలని కోరారు.​"పాత ఫర్నిచర్ షాపుల తాకిడి వల్ల స్థానిక మనుమయ కుటుంబాల పరిస్థితి ప్రస్తుతం అగమ్యగోచరంగా మారింది. వారి జీవనోపాధి దెబ్బతింటోంది. ఇప్పటికైనా ప్రతి ఒక్కరూ మేల్కొని విశ్వకర్మల హక్కుల కోసం జరిగే ఈ పోరాటంలో భాగస్వాములు కావాలి."​ఈ కార్యక్రమంలో దేవరకొండ బాబు చారి పాల్గొని తమ మద్దతును తెలియజేశారు.