నకిరేకల్ నియోజకవర్గ స్థాయి సీఎం కప్ క్రీడా పోటీలను బుధవారం నాడు పట్టణంలోని మినీ స్టేడియంలో నకిరేకల్ శాసనసభ్యులు వేముల వీరేశం ప్రారంభించారు.

ఈ సందర్భంగా ఆయన మాట్లాడుతూ క్రీడలు శారీరక దృఢత్వంతో పాటు మానసిక ఉల్లాసం, ప్రశాంతత, క్రమశిక్షణను పెంపొందిస్తాయని అన్నారు. చదువుతో పాటు క్రీడలకు కూడా సమాన ప్రాధాన్యం ఇవ్వాలని సూచించారు. యువత క్రీడల్లో చురుకుగా పాల్గొని ఆరోగ్యవంతమైన జీవనశైలిని అలవర్చుకోవాలని పిలుపునిచ్చారు.

క్రీడల ద్వారా పోటీ తత్వం, సహనం, సమన్వయం పెరుగుతాయని పేర్కొన్నారు. క్రీడాకారులను ప్రోత్సహించేందుకు ప్రభుత్వం చేపట్టిన కార్యక్రమాలు యువతకు దిశానిర్దేశం చేస్తున్నాయని అన్నారు. ఈ క్రీడా పోటీలను సద్వినియోగం చేసుకొని ప్రతిభను చాటుకోవాలని ఆయన ఆకాంక్షించారు.