రామన్నపేట మండలంలోని సిరిపురం గ్రామం శివమయంగా మారబోతోంది. శ్రీ పార్వతి పరమేశ్వర స్వామి దేవస్థానంలో బ్రహ్మోత్సవాలు రేపటి నుంచి ఈ నెల 17వ తేదీ వరకు భక్తి శ్రద్ధల మధ్య నిర్వహించనున్నారు. గ్రామం మొత్తం పండుగ వాతావరణంలో మునిగిపోయింది.

రేపు ఉదయం 8 గంటలకు రుద్రాభిషేకంతో ఉత్సవాలకు శ్రీకారం చుడతారు. ఈ నెల 16వ తేదీ సోమవారం ఉదయం 11 గంటల 10 నిమిషాలకు శివపార్వతుల కళ్యాణ మహోత్సవం ఘనంగా జరుగనుంది. 17వ తేదీ మంగళవారం సాయంత్రం 5 గంటల 15 నిమిషాలకు రథోత్సవం నిర్వహించి బ్రహ్మోత్సవాలను వైభవంగా ముగించనున్నారు. ఈ సందర్భంగా భక్తుల రాకపోకలకు, అన్నదాన కార్యక్రమాలకు విస్తృత ఏర్పాట్లు చేస్తున్నట్లు దేవస్థాన వర్గాలు తెలిపాయి.

బ్రహ్మోత్సవాల ఆహ్వాన పత్రికను నకిరేకల్ శాసనసభ్యుడు వేముల వీరేశంకు అందజేసి కార్యక్రమాలకు విచ్చేసి ఆశీర్వదించాలని గ్రామ పెద్దలు ఆహ్వానించారు. దేవస్థాన ఛైర్మన్ రాపోలు రమేష్, గ్రామ కాంగ్రెస్ అధ్యక్షుడు నర్సిరెడ్డి, అఖిల భారత గౌడ పరిషత్ న్యాయవాది సుక్క శ్రవణ్ కుమార్ తదితరులు పాల్గొన్నారు.