సిరిపురం:

సిరిపురం గ్రామానికి చెందిన మిత్రులు, గ్రామ వాసులు పున్న మల్లేశం నేత రూపొందించిన వినూత్న వరల్డ్ క్లాక్ ఆవిష్కరణ శుభ సందర్భంగా ఆయన స్వగృహానికి వెళ్లి శుభాకాంక్షలు, అభినందనలు తెలిపారు. ఈ సందర్భంగా మల్లేశం,భాగ్యలక్ష్మిలను ఘనంగా సన్మానించారు.ఒకేసారి 176 దేశాలకు సంబంధించిన సమయాన్ని తెలుసుకునే అవకాశం కల్పించే వరల్డ్ క్లాక్ రూపకల్పన సిరిపురం గ్రామానికి మరింత గౌరవాన్ని తీసుకొచ్చిన మధుర ఘట్టంగా నిలిచింది. గ్రామ స్థాయి నుంచి ప్రపంచ స్థాయికి చేరిన ఈ ఆవిష్కరణ అందరి మన్ననలను పొందింది.

ఈ కార్యక్రమంలో పాల్గొన్న తెలంగాణ తెలుగుదేశం పార్టీ రాష్ట్ర మాజీ కార్యదర్శి రాపోలు నరసింహా నేత మాట్లాడుతూ, మల్లేశం రూపొందించిన వరల్డ్ క్లాక్ అత్యంత అరుదైన, వినూత్న ఆలోచనకు నిదర్శనమని ప్రశంసించారు. ఒకే చోట ప్రపంచ దేశాల సమయాన్ని తెలుసుకునే విధంగా రూపొందించిన ఈ ఆవిష్కరణ నిజంగా అభినందనీయమని అన్నారు.ఇంతకుముందు మల్లేశం రూపొందించిన కలియుగ క్యాలెండర్కు ఇండియా బుక్ ఆఫ్ రికార్డ్, ఇంటర్నేషనల్ వరల్డ్ రికార్డ్ ఆఫ్ ఎక్సలెంట్ సంస్థల నుంచి ప్రశంసాపత్రాలు లభించడం సిరిపురం గ్రామానికే కాదు, తెలంగాణ రాష్ట్రానికే గర్వకారణమని పేర్కొన్నారు. భవిష్యత్తులో కూడా మల్లేశం మేధస్సు మరిన్ని వినూత్న పరిశోధనలతో వెలుగొందాలని ఆకాంక్షించారు.