తప్పిపోయిన విద్యార్థి ఆచూకీ కనిపెట్టిన పోలీసులు

తల్లిదండ్రుల కళ్లల్లో ఆనందం

ఎవరికి చెప్పకుండా హాస్టల్ నుంచి వెళ్లిపోయిన

విద్యార్థి ఆచూకీని గుర్తించిన నార్కెట్‌పల్లి పోలీసులు, అతడిని సురక్షితంగా తల్లిదండ్రులకు అప్పగించి వారి ఆవేదనను తీర్చారు.పోలీసులు తెలిపిన వివరాల ప్రకారం… నార్కెట్‌పల్లి బీసీ హాస్టల్‌లో 10వ తరగతి చదువుతున్న నూకల శశాంక్ (15) (తండ్రి: లేట్ నరసింహ, కులం: యాదవ్, గ్రామం: అన్నెపర్తి, నల్లగొండ జిల్లా) బుధవారం ఉదయం హాస్టల్ నుంచి ఎవరికి చెప్పకుండా బయటకు వెళ్లిపోయాడు. విషయం తెలుసుకున్న హాస్టల్ సిబ్బంది వెంటనే అతని తల్లిదండ్రులకు సమాచారం అందించి, కలిసి గాలించినప్పటికీ ఆచూకీ లభించలేదు.

దీంతో అదే రోజు రాత్రి 7 గంటల సమయంలో నార్కెట్‌పల్లి పోలీస్ స్టేషన్‌లో ఫిర్యాదు నమోదు చేశారు. కేసు నమోదు చేసిన నార్కెట్‌పల్లి ఎస్సై పి. విష్ణుమూర్తి, బాలుడి ఆచూకీ కోసం కానిస్టేబుళ్లు సత్యనారాయణ, గిరిబాబులను నియమించారు. వారు శోధన కొనసాగిస్తూ గురువారం ఉదయం 9 గంటల సమయంలో భువనగిరి బస్టాండ్‌లో బాలుడిని గుర్తించి పోలీస్ స్టేషన్‌కు తీసుకొచ్చారు.ఎస్సై సమక్షంలో బాలుడిని తల్లిదండ్రులకు అప్పగించారు. బాలుడి ఆచూకీని వేగంగా గుర్తించిన కానిస్టేబుళ్లను ఎస్సై అభినందించారు. అలాగే, భవిష్యత్తులో ఇలాంటి చర్యలకుపాల్పడకూడదని విద్యార్థికి సూచనలు ఇచ్చారు.