మహేశ్వరం నియోజకవర్గంలో ప్రపంచ స్థాయి క్యారమ్ క్రీడాకారుడు శ్రీనివాస్ను ఘనంగా సన్మానించారు. కాంగ్రెస్ పార్టీ సీనియర్ నాయకులు, టీపీసీసీ సభ్యులు దేప భాస్కర్ రెడ్డి ఆధ్వర్యంలో నిర్వహించిన కార్యక్రమంలో ఆయనకు శాలువా కప్పి అభినందనలు తెలిపారు.

ఈ సందర్భంగా భాస్కర్ రెడ్డి మాట్లాడుతూ, గ్రామీణ ప్రాంతాల్లో క్రీడాకారులను ప్రోత్సహించేందుకు తెలంగాణ ప్రభుత్వం నిర్వహిస్తున్న సీఎం కప్ ద్వారా అనేక మంది ప్రతిభావంతులు వెలుగులోకి వస్తున్నారని పేర్కొన్నారు. క్యారమ్ క్రీడలో శ్రీనివాస్ సాధించిన విజయాలు యువతకు ఆదర్శమని కొనియాడారు.

ప్రపంచ స్థాయిలో పలు సార్లు విజేతగా నిలిచి దేశానికి గౌరవం తీసుకువచ్చిన ఆయన, ఇటీవలి పోటీల్లోనూ ప్రతిభ చాటడం అభినందనీయమన్నారు. సీఎం కప్‌లో విజేతగా నిలవడం మహేశ్వరం ప్రాంతానికి గర్వకారణమని తెలిపారు.

యువత క్రీడల్లో రాణించి జాతీయ, అంతర్జాతీయ స్థాయిలో ఎదగాలని పిలుపునిచ్చారు. క్రీడాకారులకు అవసరమైన సహకారం అందించేందుకు తాము ఎల్లప్పుడూ సిద్ధంగా ఉంటామని అన్నారు.

కార్యక్రమంలో స్థానిక నాయకులు, కార్యకర్తలు, క్రీడా ప్రేమికులు పెద్ద సంఖ్యలో పాల్గొన్నారు.