న్యాల్కల్,

సంగారెడ్డి జిల్లా న్యాల్కల్ మండల కేంద్రంలో భారతీయ జనతా పార్టీ ఆధ్వర్యంలో నిర్వహించనున్న అసెంబ్లీ ముట్టడి కార్యక్రమానికి తరలి వెళ్లనున్న భాజపా శ్రేణులను పోలీసులు ముందస్తుగా అరెస్టు చేశారు. కార్యక్రమానికి పెద్ద ఎత్తున కార్యకర్తలు హాజరవుతారనే సమాచారంతో తెల్లవారు జామునే పోలీసులు చర్యలు చేపట్టారు.స్థానిక హద్నూర్ పోలీస్ స్టేషన్ పరిధిలోని భాజపా నాయకుల ఇళ్లకు చేరుకున్న పోలీసులు, మండలంలోని ప్రముఖ నాయకులు మరియు కార్యకర్తలను అదుపులోకి తీసుకున్నారు. మండల పార్టీ అధ్యక్షుడు గంగ్వార్ మల్లేష్‌తో పాటు న్యాల్కల్, ముంగి, వడ్డీ, రత్నాపూర్, హద్నూర్, గుంజేట్టి తదితర గ్రామాలకు చెందిన పార్టీ శ్రేణులను అరెస్టు చేసి స్థానిక పోలీస్ స్టేషన్‌కు తరలించారు.ఈ సందర్భంగా మండల పార్టీ అధ్యక్షుడు గంగ్వార్ మల్లేష్ మాట్లాడుతూ, తెలంగాణ ప్రజలకు ప్రభుత్వం ఇచ్చిన హామీలను నిలబెట్టే వరకు పోరాటం కొనసాగుతుందని తెలిపారు. ప్రజా సమస్యల పరిష్కారం కోసం భాజపా శ్రేణులు ఎప్పటికప్పుడు ఉద్యమాలు చేపడతాయని ఆయన పేర్కొన్నారు.అసెంబ్లీ ముట్టడి కార్యక్రమం నేపథ్యంలో పోలీసులు ముందస్తు జాగ్రత్త చర్యలుగా ఈ అరెస్టులు చేపట్టినట్లు సమాచారం.