దేశవ్యాప్తంగా రైతులకు కేంద్ర ప్రభుత్వం మరో శుభవార్త అందించింది. పీఎం కిసాన్ సమ్మాన్ నిధి పథకం కింద వచ్చే తదుపరి రూ.2,000 విడత త్వరలోనే రైతుల ఖాతాల్లో జమయ్యే అవకాశం ఉందని సమాచారం.

ఈ పథకం ద్వారా అర్హులైన రైతులకు సంవత్సరానికి రూ.6,000ను మూడు విడతలుగా నేరుగా డీబీటీ ద్వారా కేంద్రం అందిస్తోంది. ఇప్పటికే పలువురు రైతులు గత విడతల ప్రయోజనం పొందగా, ఇప్పుడు 23వ విడత కోసం ఆసక్తిగా ఎదురుచూస్తున్నారు.

తాజా అంచనాల ప్రకారం, ఈ 23వ విడత నిధులు జూలై నెలలో విడుదలయ్యే అవకాశం ఉన్నట్లు తెలుస్తోంది. అయితే ఖచ్చితమైన తేదీపై కేంద్రం ఇంకా అధికారిక ప్రకటన చేయలేదు.

ఇక, ఈ సాయం పొందాలంటే రైతులు తప్పనిసరిగా ఈ-కేవైసీ పూర్తి చేసుకోవాలని అధికారులు స్పష్టం చేస్తున్నారు. ఈ ప్రక్రియ పూర్తి చేయని వారికి డబ్బులు జమ కావు.

రైతులకు ఆర్థికంగా ఊరటనిచ్చే ఈ పథకం తదుపరి విడత ఎప్పుడు వస్తుందోనన్న ఉత్కంఠ కొనసాగుతోంది.