ఎన్నికల నిర్వహణలో రిటర్నింగ్ అధికారులు (ఆర్‌.ఓలు), సహాయ రిటర్నింగ్ అధికారులు (ఏఆర్‌.ఓలు) కీలక బాధ్యతలు నిర్వహిస్తారని, ఎన్నికల నియమ నిబంధనలపై సంపూర్ణ అవగాహనతో విధులు నిర్వహించాలని స్థానిక సంస్థల అదనపు కలెక్టర్ భాస్కర్ రావు అన్నారు.మంగళవారం భువనగిరి మున్సిపాలిటీలో పీఓలు, ఏపీఓలకు ఏర్పాటు చేసిన శిక్షణ కార్యక్రమంలో ఆయన పాల్గొని మాట్లాడారు. ఈ సందర్భంగా ఆయన మాట్లాడుతూ, ఎన్నికల నిర్వహణలో ఎలాంటి పొరపాట్లకు తావులేకుండా పారదర్శకంగా, నిష్పక్షపాతంగా విధులు నిర్వర్తించాలని సూచించారు.ఎన్నికల ప్రక్రియలో భాగంగా డిస్ట్రిబ్యూషన్ కేంద్రంలో అందించే పోలింగ్ మెటీరియల్, బ్యాలెట్ బాక్సులు, ప్రిసైడింగ్ అధికారుల డైరీ, బ్యాలెట్ పేపర్ అకౌంటు నిర్వహణ, ఏజెంట్ల సమక్షంలో బ్యాలెట్ బాక్సులను తెరవడం వంటి అంశాలపై పీఓలు, ఏపీఓలు స్పష్టమైన అవగాహన కలిగి ఉండాలన్నారు. పోలింగ్ మెటీరియల్‌ను ఒకటికి రెండుసార్లు జాగ్రత్తగా పరిశీలించాలని, ముఖ్యంగా బ్యాలెట్ పేపర్ల విషయంలో అత్యంత జాగ్రత్త వహించాలని సూచించారు.

ఆర్‌.ఓలు తమ బృందంలోని ఎన్నికల సిబ్బందికి ఎన్నికల నియమ నిబంధనలపై పూర్తి స్థాయిలో అవగాహన కల్పించాలని, విధుల నిర్వహణలో సమన్వయం కీలకమని తెలిపారు. అలాగే ప్రతి రెండు గంటలకు ఒకసారి పోలింగ్ శాతాన్ని టీ–పోల్ యాప్లో తప్పనిసరిగా అప్‌లోడ్ చేయాలని ఆదేశించారు.

ఈ కార్యక్రమంలో మున్సిపల్ కమిషనర్ రామలింగం, పీఓలు, ఏపీఓలు, సంబంధిత అధికారులు పాల్గొన్నారు.