ఎం-ప్యానల్ లేకుండా అక్రిడేషన్ నోటిఫికేషన్: జర్నలిస్టులపై చిన్నచూపు!

హైదరాబాద్: రాష్ట్రంలో అర్హత ఉన్న చిన్న పత్రికలను ఎం-ప్యానల్‌లో చేర్చకుండానే అక్రిడేషన్‌కు అప్లై చేయాలని సమాచార శాఖ నోటిఫికేషన్ జారీ చేయడం జర్నలిస్టు సంఘాల్లో తీవ్ర ఆగ్రహాన్ని రేకెత్తిస్తోంది. ఎన్నికల సమయంలో ప్రజా సమస్యలు ఎత్తి చూపి కాంగ్రెస్‌కు అండగా నిలిచిన చిన్న పత్రికలు, గ్రౌండ్ రిపోర్టర్లు ఇప్పుడు అధికార ప్రభుత్వం చేత పక్కనపెట్టబడుతున్నారా? అనే ప్రశ్నలు గుండెల్లో మీరుతున్నాయి. తెలంగాణ జర్నలిస్టుల సంక్షేమ సంఘం (టీజేఎస్ఎస్) ఈ నిర్ణయాన్ని ప్రజాస్వామ్యానికి, మీడియా స్వేచ్ఛకు ఆధారాన్ని బలహీనపరిచే చర్యగా కొట్టి చూపింది. ఎం-ప్యానల్ అనేది కేవలం ఒక ఫార్మాలిటీ కాదు – అది పత్రికల నిజస్వరూపాన్ని, క్రమప్రచురణను, ఫీల్డ్ రిపోర్టర్ల ఉనికిని, ప్రజా సమస్యలపై కథనాలను డిపిఆర్వోలు, I&P శాఖ పరిశీలించే కీలక ప్రక్రియ. దీని లేకుండా అక్రిడేషన్ ఇస్తే, పేపర్ మీద మాత్రమే ఉన్న 'బినామీ మీడియా', అధికార పార్టీ అనుకూల సంస్థలకు మార్గం సుగమమవుతుంది. రోడ్డెక్కి వార్తలు తెచ్చే నిజమైన జర్నలిస్టులు మాత్రం నష్టపోతారు. సమాచార శాఖ మంత్రి పొంగిలేటి శ్రీనివాస్ రెడ్డి ఈ రిపోర్టర్లపై 'కక్ష' కట్టారా? అని సంఘాలు ప్రశ్నిస్తున్నాయి.గత టిఆర్ఎస్ పాలితంలో చిన్న పత్రికలకు అన్యాయమైందని ప్రతిపక్షంలో ఉన్నప్పుడు ముఖ్యమంత్రి రేవంత్ రెడ్డి పలుమార్లు హైలైట్ చేశారు. ఇప్పుడు అధికారంలోకి వచ్చినా, పెద్ద పత్రికలకు ఒక్కరోజు ఇచ్చే అడ్వటైజ్మెంట్ ఖర్చులతో వందలాది చిన్న పత్రికలు బతికి బత్టుకుంటాయి. ఎన్నికల్లో మీడియా సహాయంతో అధికారాన్ని సంపాదించి, ఇప్పుడు అదే మీడియాను తొక్కివేయాలని ఈ నిర్ణయమా? 'చిన్న పత్రికలు అంటే సీఎం రేవంత్‌కి గిట్టదా?' అనే ప్రశ్న గట్టిగా వినిపిస్తోంది. పెద్దవాటికి కోట్లు ప్రకటనలు, చిన్నవాటికి ఎం-ప్యానల్ కూడా లేదు – ఇదేనా ప్రజా పాలన?

టీజేఎస్ఎస్ స్పష్టం చేసింది: అర్హ పత్రికలను ముందుగా ఎం-ప్యానల్‌లో చేర్చి, ఆ తర్వాత అక్రిడేషన్ ప్రక్రియ చేపట్టాలి. 'నచ్చినవారికి అక్రిడేషన్, ప్రశ్నించేవారికి నిరాకరణ' అనే ధోరణి ప్రజాస్వామ్యానికి ప్రమాదకరం. లేకపోతే తీవ్ర ఉద్యమం చేస్తామని హెచ్చరించారు. ముఖ్యమంత్రి రేవంత్ రెడ్డి జర్నలిస్టుల చిన్నచూపు చూడకుండా, వారికి గౌరవం, గుర్తింపు ఇవ్వడం ద్వారానే ప్రభుత్వం బలపడుతుందని సూచించారు. చిన్న పత్రికలు, నిజమైన రిపోర్టర్లకు న్యాయం జరగాలి – లేకపోతే ఇది మీడియా స్వేచ్ఛపై దాడిగా చరిత్రలో నిలుస్తుంది.