హైదరాబాద్‌లో ఘనంగా నిర్వహించిన తెలంగాణ సాహితీ కవులు, రచయితల రాష్ట్రవ్యాప్త సంఘం దశాబ్ది ఉత్సవాలు సాహిత్య వాతావరణాన్ని మరింత సుసంపన్నం చేశాయి. ఫిబ్రవరి 21, 22 తేదీల్లో జరిగిన ఈ వేడుకల్లో రాష్ట్రం నలుమూలల నుంచి కవులు, రచయితలు, సాహిత్యాభిమానులు పెద్దఎత్తున పాల్గొన్నారు. ఈ సందర్భంగా పలు గ్రంథాలను ఆవిష్కరించగా, తెలంగాణ సాహితి గ్రేటర్ హైదరాబాద్ నగర కమిటీ ఆధ్వర్యంలో “గోలకొండ కలాలు” పుస్తకాన్ని విడుదల చేశారు.

రెండు నెలలపాటు 78 మంది కవులు అక్షర సాధన చేసి, సామాజిక స్పృహతో కూడిన రచనలను సమకూర్చి ఈ గ్రంథానికి రూపురేఖలు ఇచ్చారు. తరతరాలకు ఆలోచనలను మేల్కొలిపేలా, చైతన్యాన్ని రగిలించేలా పుస్తకం సిద్ధమైనట్లు వక్తలు పేర్కొన్నారు.

ఈ బృహత్ కార్యానికి నీర్నెముల గ్రామానికి చెందిన నోముల కుమార్ ప్రచురణకర్తగా ముందుకొచ్చి, ఆర్థిక సహకారం అందించి ముద్రణ బాధ్యతలు స్వీకరించారు. ఆయన సేవలను సభలో పలువురు వక్తలు ప్రశంసించారు. రాష్ట్ర కమిటీ తరఫున ప్రత్యేక ధన్యవాదాలు తెలియజేశారు.

సభలో ఆయనను సత్కరించేందుకు ఏర్పాట్లు చేసినప్పటికీ, కుటుంబ కార్యక్రమం కారణంగా హాజరు కాలేకపోయారు. అయినప్పటికీ, సాహిత్యానికి ఆయన అందించిన అండ విశేషంగా నిలిచిందని వక్తలు కొనియాడారు.

గ్రేటర్ హైదరాబాద్ అధ్యక్షులు ఏభూషి నరసింహ మాట్లాడుతూ, సాహిత్య వికాసానికి ఇటువంటి సేవాభావం అవసరమని అన్నారు. “గోలకొండ కలాలు” గ్రంథం దశాబ్ది వేడుకలకు ప్రత్యేక ఆకర్షణగా నిలిచింది.