తెలంగాణలో ట్రాఫిక్ నిబంధనల అమలును మరింత కఠినంగా చేపట్టే దిశగా రాష్ట్ర ప్రభుత్వం కొత్త విధానాన్ని పరిశీలిస్తోంది. వాహన రిజిస్ట్రేషన్ సమయంలోనే వాహనదారుల బ్యాంకు ఖాతా వివరాలను సేకరించి, ట్రాఫిక్ చలాన్ విధించినప్పుడు నేరుగా ఖాతా నుంచి జరిమానా మొత్తం కట్ అయ్యేలా ‘ఆటో డెబిట్’ వ్యవస్థను అమల్లోకి తీసుకురావాలనే ప్రతిపాదనపై చర్చ జరుగుతోంది.ఈ విధానం అమలైతే ట్రాఫిక్ చలానాల వసూలు సులభమవుతుందని, జరిమానాల పెండింగ్ సమస్య తగ్గుతుందని ప్రభుత్వం భావిస్తోంది. నిబంధనలు ఉల్లంఘించిన వెంటనే జరిమానా ఆటోమేటిక్‌గా వసూలు కావడంతో ట్రాఫిక్ నియమాల పట్ల ప్రజల్లో మరింత అవగాహన పెరుగుతుందని అధికారులు అంచనా వేస్తున్నారు.అయితే ఈ ప్రతిపాదనపై వాహనదారుల్లో ఆందోళన వ్యక్తమవుతోంది. తమ బ్యాంకు ఖాతాలపై ప్రత్యక్ష నియంత్రణ పెరుగుతుందనే భయం వ్యక్తం చేస్తున్నారు. వ్యక్తిగత గోప్యతకు భంగం కలుగుతుందనే అభిప్రాయాలు కూడా వినిపిస్తున్నాయి. అనవసరంగా లేదా తప్పిదాల కారణంగా జరిమానాలు కట్ అయితే ఇబ్బందులు ఎదుర్కోవాల్సి వస్తుందన్న ఆందోళన కూడా ఉంది.ఇదిలా ఉండగా, రవాణా శాఖ అధికారులు ఈ అంశంపై స్పష్టత ఇస్తున్నారు. ప్రస్తుతం వాహన రిజిస్ట్రేషన్ ప్రక్రియలో బ్యాంకు ఖాతాలను లింక్ చేసే విధానం లేదని, ఆటో డెబిట్ విధానం కేవలం ఆలోచన దశలోనే ఉందని తెలిపారు. ప్రజల అభిప్రాయాలు, న్యాయపరమైన అంశాలు, గోప్యతా పరిరక్షణ వంటి అంశాలను పూర్తిగా పరిశీలించిన తర్వాతే తుది నిర్ణయం తీసుకుంటామని అధికారులు పేర్కొన్నారు.