పట్టణ ప్రజల రాకపోకలకు ఇబ్బందులు కలగకుండా వలిగొండ రోడ్డును త్వరితగతిన అభివృద్ధి చేస్తామని చౌటుప్పల్ పురపాలక సంఘం చైర్‌పర్సన్ మొగుదాల పావని రమేష్ తెలిపారు. గుంతలతో దెబ్బతిన్న రహదారి కారణంగా వాహనదారులు, స్థానికులు ఎదుర్కొంటున్న ఇబ్బందులను దృష్టిలో ఉంచుకుని అత్యవసరంగా మరమ్మతు పనులు చేపట్టినట్లు వెల్లడించారు.చైర్‌పర్సన్ ఆదేశాల మేరకు, కమిషనర్ జి. వెంకట్రాం రెడ్డి ఆధ్వర్యంలో నేడు రోడ్డు ప్యాచ్ వర్క్ చేపట్టి, రాకపోకలకు అనువుగా మారుస్తున్నారు.ఈ సందర్భంగా చైర్ పర్సన్ మాట్లాడుతూ…మునుగోడు ఎమ్మెల్యే కోమటిరెడ్డి రాజగోపాల్ రెడ్డి ప్రత్యేక సహకారంతో ఈ ప్రాంత అభివృద్ధికి చర్యలు తీసుకుంటున్నామని తెలిపారు. రోడ్లు, భవనాల శాఖ ఇంజనీర్లతో నిరంతరం సమన్వయం కొనసాగిస్తూ, సాంకేతిక సమస్యలను త్వరగా పరిష్కరించి శాశ్వత రహదారి నిర్మాణం పూర్తి చేస్తామని హామీ ఇచ్చారు.చిన్న చిన్న అడ్డంకులను అధిగమిస్తూ పనులను వేగవంతం చేసి, ప్రజలకు మెరుగైన రవాణా సౌకర్యాన్ని అందుబాటులోకి తీసుకువస్తామని స్పష్టం చేశారు.

నగర ప్రజల సౌలభ్యం కోసం మున్సిపల్ యంత్రాంగం ఎల్లప్పుడూ సిద్ధంగా ఉంటుందని, అభివృద్ధి కార్యక్రమాల్లో ప్రజలు సహకరించాలని ఈ సందర్భంగా కోరారు.