నల్లగొండ–సూర్యాపేట మార్గాన్నే కొనసాగించాలి

ఉమ్మడి నల్గొండ జిల్లా ప్రజల ఆకాంక్షలను గౌరవించాలి..

కేంద్ర, రాష్ట్ర ప్రభుత్వాలకు ప్రజాప్రతినిధుల విజ్ఞప్తి

శంషాబాద్ నుంచి నల్లగొండ, సూర్యాపేట మీదుగా చెన్నై వరకు ప్రతిపాదించిన బుల్లెట్ ట్రైన్ ప్రాజెక్టుపై ఉమ్మడి నల్గొండ జిల్లా ప్రజలు ఎన్నో ఆశలు పెట్టుకున్నారని, ప్రస్తుతం ఆ ప్రాజెక్టు అలైన్‌మెంట్ మారే అవకాశాలు ఉన్నాయనే వార్తలు ప్రజల్లో తీవ్ర ఆందోళనకు గురి చేస్తున్నాయని పలువురు అభిప్రాయపడుతున్నారు.

గతంలో శంషాబాద్–నల్లగొండ–సూర్యాపేట మార్గంలోనే బుల్లెట్ ట్రైన్‌ను తీసుకురావాలని ప్రతిపాదనలు వెలువడటంతో ఈ ప్రాంత ప్రజల్లో భారీ ఆశలు చిగురించాయి. వేగంగా అభివృద్ధి చెందుతున్న నల్లగొండ, సూర్యాపేట జిల్లాలకు బుల్లెట్ ట్రైన్ ఎంతో ఉపయోగకరంగా ఉంటుందని స్థానికులు పేర్కొంటున్నారు.

బుల్లెట్ ట్రైన్ అన్ని రైల్వే స్టేషన్లలో ఆగకపోయినా, జిల్లా కేంద్రాలైన నల్లగొండ, సూర్యాపేటలకు సమీపంలో స్టేషన్లు ఏర్పాటు చేస్తే విద్య, వైద్యం, వ్యాపారం, పారిశ్రామిక రంగాల అభివృద్ధికి కొత్త అవకాశాలు లభిస్తాయని అభిప్రాయపడుతున్నారు. అంతేకాకుండా హైదరాబాద్–చెన్నై మధ్య ప్రయాణ సమయం కూడా గణనీయంగా తగ్గుతుందని చెబుతున్నారు.

అయితే, గతంలో ప్రతిపాదించిన అలైన్‌మెంట్‌ను మార్చి మరో మార్గంలో బుల్లెట్ ట్రైన్‌ను తీసుకెళ్లే ప్రయత్నాలు జరుగుతున్నాయనే ప్రచారం స్థానిక ప్రజల్లో ఆందోళన కలిగిస్తోంది. ఉమ్మడి నల్గొండ జిల్లాకు ఈ ప్రాజెక్టు దూరమైతే భవిష్యత్ అభివృద్ధిపై తీవ్ర ప్రభావం పడే అవకాశం ఉందని పలువురు ఆందోళన వ్యక్తం చేస్తున్నారు.

ఈ నేపథ్యంలో కేంద్ర, రాష్ట్ర ప్రభుత్వాలు వెంటనే పునరాలోచన చేసి, మొదట ప్రతిపాదించిన శంషాబాద్–నల్లగొండ–సూర్యాపేట మార్గాన్నే కొనసాగించాలని ప్రజలు కోరుతున్నారు. జిల్లాకు చెందిన బీజేపీ, కాంగ్రెస్ ప్రజాప్రతినిధులు, ప్రజా నాయకులు ఈ అంశాన్ని కేంద్రం, రాష్ట్ర ప్రభుత్వాల దృష్టికి తీసుకెళ్లి పాత అలైన్‌మెంట్‌ను కొనసాగించేలా కృషి చేయాలని విజ్ఞప్తి చేస్తున్నారు.

బుల్లెట్ ట్రైన్ ప్రాజెక్టు ఉమ్మడి నల్గొండ జిల్లా మీదుగా అమలైతే ఈ ప్రాంత ఆర్థిక, పారిశ్రామిక, విద్యా, ఉపాధి రంగాల్లో గణనీయమైన అభివృద్ధికి దోహదపడుతుందని ప్రజలు ఆశాభావం వ్యక్తం చేస్తున్నారు. ప్రజల ఆకాంక్షలకు అనుగుణంగా ప్రభుత్వం సానుకూల నిర్ణయం తీసుకోవాలని కోరుతున్నారు.