ఫైనాన్షియల్‌ డిస్ట్రిక్ట్‌లో భారీ ప్రాజెక్ట్‌.. ఏషియన్‌ సినిమాస్‌తో మెగాస్టార్‌ చిరంజీవి భాగస్వామ్యం

సినీ రంగంలో హైదరాబాద్‌ మరో అంతర్జాతీయ రికార్డు దిశగా అడుగులు వేస్తోంది. ఫైనాన్షియల్‌ డిస్ట్రిక్ట్‌లో ఏషియన్‌ సినిమాస్‌, మెగాస్టార్‌ చిరంజీవి భాగస్వామ్యంతో ప్రపంచంలోనే అతిపెద్ద సినిమా స్క్రీన్‌ను ఏర్పాటు చేసేందుకు ప్రణాళికలు సిద్ధం చేస్తున్నట్లు సమాచారం. అత్యాధునిక సాంకేతిక పరిజ్ఞానంతో నిర్మించనున్న ఈ భారీ తెర ప్రస్తుత ప్రపంచ రికార్డును అధిగమించేలా ఉండనున్నట్లు తెలుస్తోంది.

ప్రస్తుతం జర్మనీలోని లియోన్‌బర్గ్‌లో ఉన్న ట్రామ్‌పలాస్ట్‌ థియేటర్‌ స్క్రీన్‌ 38.8 మీటర్ల వెడల్పు, 21 మీటర్ల ఎత్తుతో ప్రపంచంలోనే అతిపెద్ద శాశ్వత సినిమా స్క్రీన్‌గా గిన్నిస్‌ రికార్డుల్లో ఉంది. హైదరాబాద్‌లో ప్రతిపాదిత స్క్రీన్‌ ఈ రికార్డును అధిగమించే స్థాయిలో రూపొందించనున్నట్లు సినీ వర్గాల్లో ప్రచారం జరుగుతోంది. ఇప్పటికే హైదరాబాద్‌ అత్యాధునిక సినిమా అనుభవాలకు కేంద్రంగా మారుతున్న నేపథ్యంలో ఈ ప్రాజెక్ట్‌ నగర సినీ ఖ్యాతిని మరింత పెంచే అవకాశం ఉంది.

ఏషియన్‌ సినిమాస్‌తో చిరంజీవి భాగస్వామ్యంతో రానున్న ఈ ప్రీమియం సినిమా ప్రాజెక్టుకు సంబంధించిన పూర్తి వివరాలు, స్క్రీన్‌ కొలతలు, ప్రారంభ తేదీ తదితర అంశాలను అధికారికంగా ప్రకటించాల్సి ఉంది.