నల్లగొండ: ఎస్‌ఐ, పోలీస్‌ కానిస్టేబుల్‌ నియామక పరీక్షలకు సిద్ధమవుతున్న నిరుద్యోగ యువత కోసం జిల్లా పోలీస్‌ శాఖ నిర్వహించిన ఉచిత శిక్షణ ప్రిలిమినరీ స్క్రీనింగ్‌ పరీక్షకు విశేష స్పందన లభించింది.

ఆదివారం నిర్వహించిన పరీక్షకు జిల్లా వ్యాప్తంగా 2,250 మంది హాజరయ్యారు. ప్రతిభ ఆధారంగా 500 మంది అభ్యర్థులను ఎంపిక చేసి నల్లగొండ పోలీస్‌ ట్రైనింగ్‌ సెంటర్‌లో ఉచిత శిక్షణ ఇవ్వనున్నట్లు ఎస్పీ శరత్‌ చంద్ర పవార్‌ ఐపీఎస్‌ తెలిపారు.

శిక్షణలో సబ్జెక్ట్‌ నిపుణులతో బోధన, మోడల్‌ టెస్టులు, సందేహాల నివృత్తితో పాటు శారీరక దారుఢ్యంపై మార్గదర్శకత్వం అందిస్తామన్నారు. ఎంపికైన అభ్యర్థులు అవకాశాన్ని సద్వినియోగం చేసుకుని క్రమశిక్షణతో శ్రమించి పోలీస్‌ ఉద్యోగాలు సాధించాలని ఎస్పీ సూచించారు.