పటాన్‌చెరువు మండల పరిషత్‌ దుకాణాల సముదాయం పక్కన నాలుగు రోజులుగా అనాథగా ఉంటున్న వృద్ధ మహిళకు జిల్లా సంక్షేమ అధికారి లలితా కుమారి చొరవతో ఆశ్రయం లభించింది. గుర్తుతెలియని వ్యక్తులు వృద్ధ మహిళను అక్కడ వదిలి వెళ్లినట్లు స్థానికులు తెలిపారు. ఆమె పరిస్థితిని గమనించిన పరిసర ప్రాంతాల ప్రజలు నాలుగు రోజులుగా భోజనం అందిస్తూ మానవత్వంతో ఆదుకుంటున్నారు. ఈ విషయం మహిళా, శిశు, వికలాంగులు, వయోవృద్ధుల సంక్షేమ శాఖ అధికారి లలితా కుమారి దృష్టికి రావడంతో వెంటనే స్పందించి వృద్ధ మహిళకు సురక్షితమైన ఆశ్రయం కల్పించాలని జిల్లా ఫీల్డ్‌ రెస్పాన్స్‌ అధికారి సతీష్‌ను ఆదేశించారు. అధికారుల ఆదేశాల మేరకు సతీష్‌ కార్యాలయ సిబ్బందితో కలిసి వృద్ధ మహిళ వద్దకు చేరుకుని భోజనం అందించడంతో పాటు అవసరమైన దుస్తులు సమకూర్చారు. అనంతరం ఆమెను అమీన్పూర్‌లోని మహిమ మినిస్ట్రీస్‌ వృద్ధుల ఆశ్రమానికి సురక్షితంగా తరలించి ఆశ్రయం కల్పించారు. వృద్ధ మహిళకు సకాలంలో స్పందించి అండగా నిలిచిన జిల్లా సంక్షేమ అధికారి లలితా కుమారి, సిబ్బందిని స్థానికులు అభినందించారు. ఈ కార్యక్రమంలో వీణ, ప్రమీల, జబ్బర్, అల్తాఫ్‌తో పాటు కార్యాలయ సిబ్బంది పాల్గొన్నారు.