నల్లగొండ జిల్లా చిట్యాల మున్సిపాలిటీలో ఎన్నికల వేడి మరింత పెరిగింది. బిఆర్ఎస్ పార్టీ అభ్యర్థుల గెలుపు లక్ష్యంగా నకిరేకల్ మాజీ ఎమ్మెల్యే చిరుమర్తి లింగయ్య చిట్యాల పట్టణంలో ఇంటింటి ప్రచారం నిర్వహించారు. ఈ సందర్భంగా స్థానిక ఎమ్మెల్యే వేముల వీరేశంపై తీవ్రస్థాయిలో సవాల్ విసిరారు.

తాను గత నాలుగున్నర సంవత్సరాల కాలంలో చిట్యాల పట్టణ అభివృద్ధికి చేసిన పనులపై బహిరంగ చర్చకు సిద్ధంగా ఉన్నానని లింగయ్య స్పష్టం చేశారు. అదే విధంగా ఎమ్మెల్యే వీరేశం గెలిచిన తర్వాత రెండున్నర సంవత్సరాల్లో చేసిన అభివృద్ధిపై చర్చించేందుకు సిద్ధంగా ఉన్నారా అని ప్రశ్నించారు.

చర్చకు సిద్ధమై కనకదుర్గమ్మ ఆలయానికి వచ్చి అభివృద్ధి అంశాలపై మాట్లాడితే, తాను బిఆర్ఎస్‌కు చెందిన 12 మంది మున్సిపల్ అభ్యర్థులను పోటీ నుంచి తప్పించేందుకు సిద్ధమని లింగయ్య సంచలన ప్రకటన చేశారు. అదే విధంగా, ఎమ్మెల్యే వీరేశం చర్చకు రాకుండా అభివృద్ధి చేయలేదని తేలితే, కాంగ్రెస్ పార్టీకి చెందిన 12 మంది అభ్యర్థులను పోటీ నుంచి తప్పించేందుకు సిద్ధమా అని ప్రశ్నించారు.

ఈ సవాలను స్వీకరిస్తే కనకదుర్గమ్మ ఆలయం వద్దకు వచ్చి అభివృద్ధిపై బహిరంగ చర్చ జరపాలని ఆయన స్పష్టం చేశారు.

ఈ వ్యాఖ్యలు చిట్యాల రాజకీయాల్లో తీవ్ర చర్చకు దారితీస్తుండగా, ఎమ్మెల్యే వీరేశం దీనిపై ఎలా స్పందిస్తారన్నది ఆసక్తిగా మారింది.మున్సిపల్ ఎన్నికల నేపథ్యంలో ఇరు పార్టీల మధ్య అభివృద్ధి అంశమే ప్రధాన ఆయుధంగా మారుతుండటం గమనార్హం.