ఆత్మకూరు మండలంలో పెద్దపులి సంచారం – పల్లెపహాడ్, పారుపల్లి గ్రామాల్లో భయాందోళన

ఆత్మకూరు మండలంలో ఒక్కసారిగా కలకలం రేగింది. అడవిని దాటి పెద్దపులి గ్రామాల వైపు చేరినట్లు అటవీ శాఖ అధికారులు ప్రకటించడంతో పల్లెపహాడ్, పారుపల్లి గ్రామాల్లో భయాందోళన నెలకొంది. సుమారు మూడు వందల కిలోల బరువున్న పెద్దపులి సంచరిస్తోందన్న సమాచారం ప్రజలను ఉలిక్కిపడేలా చేసింది.పొలాలు, వ్యవసాయ బావులు, అటవీ సరిహద్దుల వద్ద పెద్దపులి కదలికలు ఉన్నట్లు గుర్తించిన అధికారులు అప్రమత్తమయ్యారు. రైతులు, గ్రామస్తులు అత్యంత జాగ్రత్తగా ఉండాలని సూచించారు. ముఖ్యంగా రాత్రి వేళల్లో ఒంటరిగా పొలాల వైపు వెళ్లవద్దని, పశువులను బయట వదలకుండా కట్టుదిట్టమైన చర్యలు తీసుకోవాలని హెచ్చరించారు.గ్రామాల్లో అవసరం లేని సంచారం మానుకోవాలని, పిల్లలను బయటకు పంపవద్దని అటవీ శాఖ స్పష్టం చేసింది. పెద్దపులి ఆనవాళ్లు కనిపించినా, దర్శనమిచ్చినా వెంటనే అధికారులకు తెలియజేయాలని కోరింది. పరిస్థితిని నిరంతరం పర్యవేక్షిస్తున్నామని, ప్రజల భద్రతే ప్రధాన లక్ష్యమని అధికారులు తెలిపారు.

ఆత్మకూరు మండలంలో పెద్దపులి సంచారం… ప్రజల్లో ఆందోళన… గ్రామాలపై ముప్పు మేఘం కమ్ముకున్న వేళ అప్రమత్తతే రక్షణగా మారింది.