స్థానికం ప్రధాన ప్రతినిధి కొండ మల్లేశం గౌడ్

రాష్ట్ర రోడ్లు భవనాలు, సినిమాటోగ్రఫీ శాఖ మంత్రి శ్రీ కోమటిరెడ్డి వెంకట్ రెడ్డి మంగళవారం (20-01-2026) యాదాద్రి భువనగిరి జిల్లాలో విస్తృతంగా పర్యటించనున్నారు. ఈ సందర్భంగా ఆధ్యాత్మిక కార్యక్రమాలతో పాటు అభివృద్ధి, సంక్షేమ కార్యక్రమాల్లో పాల్గొని పలు కీలక పనులకు శ్రీకారం చుట్టనున్నారు.ఉదయం 9.30 గంటలకు యాదగిరిగుట్టలో కొలువైన శ్రీ లక్ష్మీ నరసింహ స్వామి వారిని మంత్రి దర్శించుకొని ప్రత్యేక పూజలు నిర్వహించనున్నారు. అనంతరం ఉదయం 10.30 గంటలకు యాదగిరిగుట్ట మండలం సైదాపూర్ గ్రామంలో నూతనంగా నిర్మించిన రెండు అంగన్వాడీ భవనాలను ప్రారంభించి, గ్రామీణ విద్యా మౌలిక వసతుల బలోపేతానికి తమ కట్టుబాటును చాటనున్నారు.ఉదయం 11 గంటలకు సైదాపూర్ గ్రామంలో నూతన సబ్ స్టేషన్ నిర్మాణానికి శంకుస్థాపన చేయనుండగా, 11.30 గంటలకు యాదగిరిగుట్ట మున్సిపల్ కేంద్రంలో మహిళా స్వయం సహాయక సంఘాలకు వడ్డీ లేని రుణాల పంపిణీ కార్యక్రమంలో పాల్గొననున్నారు. మహిళల ఆర్థిక స్వావలంబన లక్ష్యంగా ప్రభుత్వం అమలు చేస్తున్న పథకాలకు ఇది మరింత ఊతమివ్వనుంది.మధ్యాహ్నం 12.30 గంటలకు ఆలేరు మున్సిపల్ కేంద్రంలో స్థానిక ఎమ్మెల్యే, ప్రభుత్వ విప్ బీర్ల ఐలయ్య తో కలిసి మహిళా స్వయం సహాయక సంఘాలకు వడ్డీ లేని రుణాల పంపిణీ కార్యక్రమంలో పాల్గొననున్నారు. అనంతరం మధ్యాహ్నం 1.30 గంటలకు మోటకొండూరు మండలం మాటూరు గ్రామంలో నూతన సబ్ స్టేషన్ నిర్మాణానికి శంకుస్థాపన చేసి, విద్యుత్ మౌలిక వసతుల విస్తరణకు బాటలు వేయనున్నారు.ఇదే రోజున మంత్రి పలు స్థానిక కార్యక్రమాల్లో పాల్గొని ప్రజలతో మమేకమై వారి సమస్యలను తెలుసుకొని, అభివృద్ధి, సంక్షేమ కార్యక్రమాల అమలుపై అధికారులతో సమీక్షించనున్నారు. జిల్లాలో అభివృద్ధి వేగవంతం చేయడమే లక్ష్యంగా ఈ పర్యటన సాగనుందని అధికార వర్గాలు తెలిపాయి.