వలిగొండ, : మహాత్మా గాంధీ జాతీయ గ్రామీణ ఉపాధి హామీ చట్టాన్ని నిర్వీర్యం చేసేలా కేంద్ర ప్రభుత్వం తీసుకొచ్చిన ‘విబిజీ రామ్‌జీ’ చట్టాన్ని వెంటనే రద్దు చేయాలని తెలంగాణ వ్యవసాయ కార్మిక సంఘం జిల్లా ప్రధాన కార్యదర్శి కొండమడుగు నర్సింహ, జిల్లా ఉపాధ్యక్షుడు సిర్పంగి స్వామి డిమాండ్ చేశారు.

యాదాద్రి భువనగిరి జిల్లా వలిగొండ మండలం సంగెం గ్రామంలో ఉపాధి హామీ పనుల వద్ద నిర్వహించిన కూలీల సమావేశంలో వారు మాట్లాడారు. ఉపాధి హామీ చట్టం వామపక్షాల పోరాట ఫలితంగా 2005లో అమల్లోకి వచ్చిందని గుర్తుచేశారు. ప్రస్తుతం కేంద్ర ప్రభుత్వం నిధులను తగ్గిస్తూ చట్టాన్ని బలహీనపరుస్తోందని ఆరోపించారు.

కొత్త విధానంలో రాష్ట్ర ప్రభుత్వాలు 40 శాతం వాటా చెల్లించాల్సి రావడం వల్ల కూలీలకు పనులు దొరకకుండా చేసే పరిస్థితి ఏర్పడుతుందని ఆవేదన వ్యక్తం చేశారు. పనిస్థలాల్లో రెండుసార్లు ఫోటోలు తీసే విధానం కూలీలను అవమానించేలా ఉందన్నారు.

సంవత్సరానికి 200 రోజుల పని కల్పించి రోజుకూలీని రూ.600కు పెంచాలని, పనిముట్లు ఉచితంగా ఇవ్వాలని, భూమిలేని వ్యవసాయ కార్మికులకు ఏడాదికి రూ.12 వేల ఆర్థిక సాయం అమలు చేయాలని డిమాండ్ చేశారు.

కార్యక్రమంలో భీమనబోయిన జంగయ్య, మద్దెల శంకరయ్య, జక్కల అంజయ్య, చేగురి నర్సింహ, యాదమ్మ తదితరులు పాల్గొన్నారు.