కలెక్టర్‌కు అంగన్వాడీ యూనియన్ వినతి

యాదాద్రి భువనగిరి:స్థానికం ప్రధాన ప్రతినిధి

గత సంవత్సరం జూలై నెలలో రిటైర్మెంట్ పొందిన అంగన్వాడీ టీచర్లకు ఇప్పటివరకు రిటైర్మెంట్ బెనిఫిట్స్ అందకపోవడం దురదృష్టకరమని, వెంటనే వాటిని చెల్లించాలని కోరుతూ తెలంగాణ అంగన్వాడీ టీచర్స్ అండ్ హెల్పర్స్ యూనియన్ యాదాద్రి భువనగిరి జిల్లా అధ్యక్షురాలు బూరుగు స్వప్న, జిల్లా ప్రధాన కార్యదర్శి చిలివేరు రమాకుమారి ఆధ్వర్యంలో మంగళవారం జిల్లా కలెక్టర్‌కు వినతిపత్రం అందజేశారు.ఈ సందర్భంగా వారు మాట్లాడుతూ, యూనియన్ ఆధ్వర్యంలో అనేక దశల్లో సాగిన పోరాటాల ఫలితంగా రిటైర్మెంట్ పొందిన అంగన్వాడీ టీచర్లకు రెండు లక్షల రూపాయలు, ఆయాలకు లక్ష రూపాయల రిటైర్మెంట్ బెనిఫిట్స్ ప్రకటించిన ప్రభుత్వం వాటిని ఇప్పటివరకు అమలు చేయకపోవడం తీవ్ర ఆవేదనకు గురిచేస్తోందన్నారు. పదవీ విరమణ చేసిన మహిళా ఉద్యోగులు ఆర్థిక ఇబ్బందులు ఎదుర్కొంటున్న పరిస్థితిని ప్రభుత్వం గుర్తించాలని కోరారు.రిటైర్మెంట్ బెనిఫిట్స్‌తో పాటు ఎలాంటి షరతులు లేకుండా పెన్షన్ సౌకర్యాన్ని కూడా కల్పించాలని కలెక్టర్‌ను కోరినట్లు తెలిపారు. ఈ వినతిపత్రాన్ని జిల్లా కలెక్టరేట్‌లో అడ్మినిస్ట్రేషన్ ఆఫీసర్ జగన్మోహన్ ప్రసాద్‌కు అందజేశారు.ఈ కార్యక్రమంలో సిఐటియు జిల్లా నాయకులు దాసరి పాండు, రిటైర్మెంట్ పొందిన అంగన్వాడీ కార్యకర్తలు అంజమ్మ, తులసమ్మ, లక్ష్మమ్మ, వరలక్ష్మీ, వెంకమ్మ, అంజమ్మ తదితరులు పాల్గొన్నారు.