స్థానికం ప్రధాన ప్రతినిధి

ఆంధ్రప్రదేశ్ రైతు సంఘం ఆధ్వర్యంలో సాగిన పోరాటాల ఫలితంగానే కందుల కొనుగోలు కేంద్రాలు ప్రారంభమయ్యాయని సిపిఐ నాయకులు స్పష్టం చేశారు. ఆదోని మండలంలో రైతులు పండించిన కంది పంట మొత్తాన్ని కొనుగోలు చేసేందుకు ప్రభుత్వం కేడీసీఎంఎస్ అధికారులకు అనుమతి ఇచ్చిందని రైతు సంఘం సీనియర్ నాయకులు కే. లక్ష్మిరెడ్డి, సిపిఐ జిల్లా కార్యవర్గ సభ్యుడు సుదర్శన్, సిపిఐ ఆదోని మండల కార్యదర్శి కల్లుబావి రాజు తెలిపారు.

స్థానిక ఆదోని మార్కెట్ యార్డులో కొద్ది రోజులుగా కొనసాగుతున్న కందుల కొనుగోలు కేంద్రాన్ని సిపిఐ, రైతు సంఘం నాయకులు పరిశీలించారు. ఈ సందర్భంగా వారు మాట్లాడుతూ, అతివృష్టి, అనావృష్టి పరిస్థితుల మధ్య రైతులు ఆరుకాలం కష్టపడి పండించిన పంటను అమ్ముకునేందుకు మార్కెట్ యార్డుకు తీసుకొస్తే అధికారులు నాణ్యత లేదని, తాలు, తబకలు, గింజలు పుచ్చు పట్టాయని రకరకాల పేర్లు పెట్టి కొనుగోలు చేయకుండా రైతులను ఇబ్బందులకు గురి చేస్తున్నారని ఆవేదన వ్యక్తం చేశారు.

ప్రభుత్వం రైతులకు ఒక మాట, అధికారులకు మరో మాట చెప్పడం చంద్రబాబు ప్రభుత్వానికి వెన్నతో పెట్టిన విద్యగా మారిందని విమర్శించారు. ప్రభుత్వం తన నిర్ణయాన్ని వెంటనే మార్చుకోకపోతే భవిష్యత్తులో కూటమి ప్రభుత్వానికి తగిన గుణపాఠం చెబుతామని హెచ్చరించారు.రైతులు తీసుకొచ్చిన కందులను నాణ్యత పేరుతో తిరస్కరించి చిత్రహింసలకు గురి చేస్తే కొనుగోలు కేంద్రాల ఎదుట పెద్ద ఎత్తున ధర్నాలు నిర్వహిస్తామని స్పష్టం చేశారు.