రహదారుల నాశనంతో ప్రాణాలకు ముప్పు

కఠిన చర్యలు తప్పవు:

రామన్నపేట (స్థానిక ప్రతినిధి):

పొలాల పనుల పేరిట ఫుల్ వీల్స్‌తో ట్రాక్టర్లను రోడ్లపైకి దించితే చట్టం తన పని తాను చేస్తుందని రామన్నపేట సబ్ ఇన్‌స్పెక్టర్ డి. నాగరాజు స్పష్టం చేశారు. కొందరు ట్రాక్టర్ యజమానులు, డ్రైవర్లు నిబంధనలను బేఖాతరు చేస్తూ ఫుల్ వీల్స్‌తో రహదారులపై తిరగడం వల్ల రోడ్లు పూర్తిగా ధ్వంసమవుతున్నాయని తెలిపారు.

రోడ్లు ఖరాబ్ కావడంతో ద్విచక్ర, నాలుగు చక్రాల వాహనదారులకు ప్రమాదాల ముప్పు పెరుగుతోందని, ప్రజల భద్రత దృష్ట్యా ఇకపై ప్రత్యేక తనిఖీలు చేపట్టి నిబంధనలు ఉల్లంఘించే ట్రాక్టర్లపై కఠిన చర్యలు తీసుకుంటామని హెచ్చరించారు. పట్టుబడితే జరిమానాలు, కేసులు తప్పవని స్పష్టం చేశారు.

ట్రాక్టర్ యజమానులు, డ్రైవర్లు ఇప్పటికైనా అప్రమత్తమై నిబంధనలు పాటించాలని, లేదంటే పోలీస్ చర్యలను ఎదుర్కోవాల్సి ఉంటుందని ఎస్‌ఐ తేల్చి చెప్పారు.