పేదరికం ఆమె ప్రతిభకు అడ్డుకాలేదు.. సర్కారు చదువు ఆమె లక్ష్యానికి తక్కువ కాలేదు.. పట్టుదలతో చదివి ఇంటర్మీడియట్ ఫలితాల్లో రాష్ట్రస్థాయిలో సత్తా చాటింది యాదాద్రి భువనగిరి జిల్లాకు చెందిన ఓ సామాన్య విద్యార్థిని. చౌటుప్పల్ మున్సిపాలిటీ పరిధిలోని లింగారెడ్డిగూడెం గ్రామానికి చెందిన తోర్పునూరి నేహశ్రీ ఇంటర్ ప్రథమ సంవత్సర ఫలితాల్లో అద్భుత ప్రతిభ కనబరిచింది.​ ​రంగారెడ్డి జిల్లా ఇబ్రహీంపట్నంలోని మహాత్మా జ్యోతిరావు పూలే వెనుకబడిన తరగతుల సంక్షేమ గురుకుల బాలికల కళాశాలలో నేహశ్రీ చదువుతోంది. ఇటీవల విడుదలైన ఇంటర్ ఫలితాల్లో ఆమె 470 మార్కులకు గాను 466 మార్కులు సాధించి రాష్ట్రస్థాయి ర్యాంకును కైవసం చేసుకుంది. ​నిరుపేద కుటుంబానికి చెందిన నేహశ్రీ తన ప్రాథమిక, ఉన్నత పాఠశాల విద్యను కూడా ప్రభుత్వ పాఠశాలల్లోనే పూర్తి చేసింది. ప్రైవేటు సంస్థలకు దీటుగా ప్రభుత్వ కళాశాలలో చదువుతూ ఈ ఘనత సాధించడం విశేషం. ఈ సందర్భంగా నేహశ్రీని గ్రామస్థులు, కళాశాల ఉపాధ్యాయులు ఘనంగా అభినందించారు. రాష్ట్రస్థాయి ర్యాంకుతో తమ గ్రామానికి, జిల్లాకు పేరు తెచ్చిన నేహశ్రీ భవిష్యత్తులో మరిన్ని విజయాలు సాధించాలని వారు ఆకాంక్షించారు.