నార్కెట్ పల్లి స్థానికం ప్రతినిధి కొమిడాల మహేందర్ రెడ్డి

రోడ్డు ప్రమాదాల నివారణే లక్ష్యంగా నల్గొండ జిల్లా ఎస్పీ శరత్ చంద్ర పవార్ ఐపీఎస్ ఆదేశాల మేరకు “నో హెల్మెట్ – నో పెట్రోల్” అవగాహన కార్యక్రమాన్ని నార్కెట్‌పల్లి పోలీస్ స్టేషన్ పరిధిలో నిర్వహించారు.

ఈ కార్యక్రమంలో భాగంగా నార్కెట్‌పల్లి పరిధిలోని వివిధ పెట్రోల్ బంకులను పోలీసులు సందర్శించి, హెల్మెట్ ధరించకుండా వచ్చే ద్విచక్ర వాహనదారులకు పెట్రోల్ సరఫరా చేయవద్దని బంకు యజమానులు, సిబ్బందికి స్పష్టమైన సూచనలు చేశారు. హెల్మెట్ తీసుకువచ్చిన తరువాత మాత్రమే పెట్రోల్ అందించాలని తెలిపారు.

అదేవిధంగా, హెల్మెట్ ధరించడం వల్ల కలిగే ప్రయోజనాలు, రోడ్డు ప్రమాదాల్లో ప్రాణరక్షణకు హెల్మెట్ ఎంతగానో ఉపయోగపడుతుందనే అంశాలపై ప్రజలకు అవగాహన కల్పించారు. చిన్న నిర్లక్ష్యం ప్రాణాంతకంగా మారే ప్రమాదం ఉందని పోలీసులు హెచ్చరించారు.

రోడ్డు భద్రతపై ప్రతి ఒక్కరూ బాధ్యతగా వ్యవహరించాలని, చట్టాన్ని గౌరవిస్తూ హెల్మెట్‌ను తప్పనిసరిగా ధరించాలని పోలీసులు పిలుపునిచ్చారు. ఈ కార్యక్రమంతో ద్విచక్ర వాహనదారుల్లో అవగాహన పెరుగుతుందని, ప్రమాదాల సంఖ్య తగ్గుతుందని పోలీసులు ఆశాభావం వ్యక్తం చేశారు.