సంగారెడ్డి జిల్లా రాయికోడ్ మండలం నల్లంపల్లి గ్రామంలో గ్రామ దేవత శ్రీ రేణుక ఎల్లమ్మ తల్లి అభిషేక మహోత్సవాన్ని భక్తిశ్రద్ధలతో ఘనంగా నిర్వహించనున్నారు. మే 12, 2026 మంగళవారం ఉదయం 9:30 గంటలకు జరిగే ఈ పవిత్ర కార్యక్రమానికి గ్రామంలో అన్ని ఏర్పాట్లు పూర్తి చేశారు. ఈ సందర్భంగా నిర్వాహకులు ఎర్రే గొల్ల కృష్ణ యాదవ్ మాట్లాడుతూ గ్రామ ప్రజల ఆయురారోగ్యాలు, సుఖసంతోషాలు, గ్రామ సుభిక్షం కోసం అమ్మవారికి ప్రత్యేక అభిషేకాలు నిర్వహిస్తున్నామని తెలిపారు. గ్రామంలో శాంతి, ఐక్యత, పంటల సమృద్ధి నెలకొనాలని అమ్మవారిని ప్రార్థిస్తున్నామని పేర్కొన్నారు. కార్యక్రమంలో ప్రత్యేక పూజలు, హారతులు నిర్వహించనున్నట్లు తెలిపారు. అనంతరం భక్తులకు తీర్థ ప్రసాదాలు పంపిణీ చేయనున్నట్లు చెప్పారు. గ్రామంలోని చిన్నా పెద్దలు, మహిళలు, యువత అధిక సంఖ్యలో పాల్గొని అమ్మవారి దీవెనలు పొందాలని నిర్వాహకులు మనస్ఫూర్తిగా ఆహ్వానించారు.