గ్రామీణ మేధస్సుకు ‘ఇన్నోవేషన్’ ఊతం..

తరలివచ్చిన ఉమ్మడి జిల్లా ఆవిష్కర్తలు..

మార్గదర్శకత్వం వహించిన హైదరాబాద్ నిపుణులు..

​నల్లగొండ : మారుమూల గ్రామాల్లోని వినూత్న ఆలోచనలకు రెక్కలు తొడిగి వాటిని విజయవంతమైన వ్యాపారాలుగా మార్చేందుకు ప్రభుత్వం మరో ముందడుగు వేసింది. శనివారం నల్లగొండలోని ఐటీ టవర్‌లో తెలంగాణ ఇన్నోవేషన్ సెల్ (టీజీఐసీ) ఆధ్వర్యంలో ‘ఇన్నోవేషన్ పంచాయత్’ కార్యక్రమాన్ని అత్యంత ఉత్సాహంగా నిర్వహించారు. నల్లగొండతో పాటు యాదాద్రి భువనగిరి, సూర్యాపేట జిల్లాల నుంచి సుమారు 60 మందికి పైగా ఔత్సాహిక పారిశ్రామికవేత్తలు, విద్యార్థులు, గ్రామీణ ఆవిష్కర్తలు తమ సరికొత్త ఆలోచనలతో ఈ కార్యక్రమానికి తరలివచ్చారు.

రాజధానిలోని స్టార్టప్ సంస్కృతిని జిల్లాలకు చేరువ చేయడమే లక్ష్యంగా సాగిన ఈ భేటీలో.. హైదరాబాద్‌కు చెందిన 12 మంది అగ్రశ్రేణి మెంటార్లు ఆవిష్కర్తలకు మార్గదర్శకత్వం వహించారు. వ్యవసాయం, ఆరోగ్యం, పర్యావరణహిత ఇంధన వనరుల రంగాల్లో స్థానిక యువత రూపొందించిన నమూనాలను (ప్రోటోటైప్స్) నిపుణులు పరిశీలించారు. నిధుల సమీకరణ, మార్కెటింగ్ మెళకువలు, వ్యాపార విస్తరణలో ఎదురయ్యే సవాళ్లపై ఆవిష్కర్తలకు ఉన్న సందేహాలను నివృత్తి చేశారు.

నల్లగొండలో టీజీఐసీ కేంద్రం ఉండాలి.. కలెక్టర్

కార్యక్రమానికి ముఖ్యఅతిథిగా విచ్చేసిన జిల్లా కలెక్టర్ బడుగు చంద్రశేఖర్ మాట్లాడుతూ.. కేవలం ఆలోచనలు ఉండటమే కాకుండా వాటిని ఆచరణలోకి తెచ్చే స్పష్టత ఉన్నప్పుడే విజయం సాధ్యమన్నారు. నల్లగొండ జిల్లా విద్యా కేంద్రంగా మారుతున్న నేపథ్యంలో ఇక్కడి యువతకు నిరంతరం తోడ్పాటు అందించేందుకు ఐటీ టవర్‌లో టీజీఐసీ తన కేంద్రాన్ని ఏర్పాటు చేయాలని ఆయన కోరారు. హైదరాబాద్‌లోని టెక్ హబ్‌ల తరహాలోనే జిల్లాల్లోనూ ఆవిష్కరణల నాడి బలంగా ఉందని టీజీఐసీ సీఈఓ మెరాజ్ ఫహీమ్ అభివర్ణించారు. సంప్రదాయ జ్ఞానాన్ని ఆధునిక సాంకేతికతతో జోడించి స్థానిక ఆవిష్కర్తలు అద్భుతాలు సృష్టిస్తున్నారని కొనియాడారు. గ్రామీణ ఆవిష్కరణలకు ప్రభుత్వ మద్దతును నేరుగా అందించడం ద్వారా రాష్ట్ర ఆర్థిక భవిష్యత్తుకు బాటలు వేస్తున్నామని ఆయన పేర్కొన్నారు. ఈ కార్యక్రమంలో టీజీఐసీ బృందం, స్థానిక అధికారులు మరియు పెద్ద సంఖ్యలో ఔత్సాహికులు పాల్గొన్నారు.

​