కలెక్టర్‌కు నివేదిక సమర్పించినట్లు అదనపు కలెక్టర్ ప్రేమ్‌కరణ్ రెడ్డి వెల్లడి...

వైద్యుల కొరత, ఖాళీల భర్తీపై మంత్రులు, అధికారులతో చర్చిస్తామని హామీ...

​ఆసుపత్రిలో పటిష్ట భద్రతకు చర్యలు...

​నల్గొండ : నల్గొండ జిల్లా ప్రభుత్వ ప్రధాన ఆసుపత్రి (జీజీహెచ్)లో శుక్రవారం చోటుచేసుకున్న గర్భస్థ శిశు మరణ ఘటనపై అధికారులు విచారణ పూర్తి చేశారు. బాధితుల ఆరోపణలు, వైద్య సిబ్బంది వివరణలు మరియు ఆధారాలను సమగ్రంగా పరిశీలించి రూపొందించిన వివరాల నివేదికను జిల్లా కలెక్టర్‌కు సమర్పించినట్లు స్థానిక సంస్థల ఇన్‌చార్జి అదనపు కలెక్టర్ ప్రేమ్‌కరణ్ రెడ్డి శనివారం ఒక ప్రకటనలో తెలిపారు. శనివారం జీజీహెచ్‌లో డిప్యూటీ సూపరింటెండెంట్ డాక్టర్ నగేష్, వివిధ విభాగాల అధిపతులు (హెచ్ఓడీలు) మరియు నర్సింగ్ సూపరింటెండెంట్ నీలాబాయితో అదనపు కలెక్టర్ సమీక్షా సమావేశం నిర్వహించారు. ఆసుపత్రిలోని సమస్యలతో పాటు గర్భస్థ శిశు మరణ ఉదంతంపై సుదీర్ఘంగా చర్చించారు.

​సిబ్బంది కొరత పరిష్కారానికి కృషి...

సమీక్షలో గైనకాలజీ సహా పలు విభాగాల్లో ఎదురవుతున్న వైద్యులు, నర్సింగ్ సిబ్బంది కొరతను హెచ్ఓడీలు అదనపు కలెక్టర్ దృష్టికి తీసుకువచ్చారు. దీనిపై ఆయన స్పందిస్తూ..రోగులకు ఇబ్బందులు కలగకుండా డ్యూటీలు కేటాయించడం, ఇతర పెండింగ్ సమస్యలను పరిష్కరించడానికి మెడికల్ కాలేజీ ప్రిన్సిపాల్‌తో త్వరలోనే చర్చిస్తామని పేర్కొన్నారు. ఆసుపత్రిలో ఖాళీగా ఉన్న పోస్టుల భర్తీ, కొత్త నియామకాల ఫైళ్లకు వేగంగా ఆమోదం లభించేలా జిల్లా ఇన్‌చార్జి మంత్రి, జిల్లా మంత్రి, ఆరోగ్య శాఖ మంత్రి దృష్టికి తీసుకెళ్తామని హామీ ఇచ్చారు.

​పటిష్టమైన భద్రత, మెరుగైన సేవలు...

ఆసుపత్రి పరిసరాల్లో భద్రతను మరింత పటిష్టం చేయాల్సిన అవసరం ఉందని అధికారులు సూచించారని, ఈ విషయాన్ని జిల్లా కలెక్టర్ దృష్టికి తీసుకెళ్లి అవసరమైన చర్యలు తీసుకుంటామని అదనపు కలెక్టర్ తెలిపారు. గైనకాలజీ విభాగంలో జరిగిన ఘటనపై నర్సింగ్ సూపరింటెండెంట్ నీలాబాయి అందించిన నివేదికను కూడా కలెక్టర్‌కు పంపినట్లు చెప్పారు. సంబంధిత శాఖల సమన్వయంతో సమస్యలను అధిగమించి ప్రజలకు మెరుగైన ఉచిత వైద్య సేవలు అందేలా చూస్తామని స్పష్టం చేశారు. ​ఈ నివేదిక ఆధారంగా జిల్లా కలెక్టర్ ఎలాంటి చర్యలు తీసుకుంటారనే దానిపై ప్రస్తుతం సర్వత్రా ఆసక్తి నెలకొంది.