ద్విచక్ర వాహనం దొంగతనం జరిగిన రెండు గంటల్లోనే కేసును ఛేదించి వాహనాన్ని స్వాధీనం చేసుకున్నట్లు నారాయణఖేడ్ ఎస్సై రాసుల శ్రీశైలం తెలిపారు. నారాయణఖేడ్ మండలంలోని వెంకటాపూర్ గ్రామపంచాయతీ పరిధి హట్యా నాయక్ తండాకు చెందిన మేఘావత్ హన్మ నాయక్ తన హీరో ఫ్యాషన్ ప్రో ద్విచక్ర వాహనం (TS15 ET 9659)ను శుక్రవారం రాత్రి ఇంటి ముందు నిలిపి ఉంచాడు. శనివారం ఉదయం వాహనం కనిపించకపోవడంతో వెంటనే పోలీసులకు ఫిర్యాదు చేశాడు. ఫిర్యాదు అందుకున్న ఎస్సై రాసుల శ్రీశైలం సిబ్బందితో కలిసి వెంటనే దర్యాప్తు ప్రారంభించారు. సాంకేతిక ఆధారాలు, ఇతర సమాచారాన్ని సేకరించి చాకచక్యంగా దర్యాప్తు చేయగా, దొంగిలించబడిన వాహనం జూకల్ శివారులోని డబుల్ బెడ్‌రూమ్ ఇళ్ల వద్ద ఉన్నట్లు గుర్తించారు. వెంటనే అక్కడికి చేరుకున్న పోలీసులు వాహనాన్ని స్వాధీనం చేసుకుని బాధితుడికి అప్పగించే చర్యలు చేపట్టారు. దొంగతనం జరిగిన కొద్ది గంటల్లోనే వాహనాన్ని గుర్తించి స్వాధీనం చేసుకోవడంతో బాధితుడు పోలీసులకు కృతజ్ఞతలు తెలిపారు. ఈ సందర్భంగా ఎస్సై రాసుల శ్రీశైలం మాట్లాడుతూ ప్రజలు తమ ద్విచక్ర వాహనాలను సురక్షితమైన ప్రదేశాల్లో నిలిపి ఉంచాలని, వాహనాల భద్రత విషయంలో అప్రమత్తంగా ఉండాలని సూచించారు.