స్థానికం ప్రధాన ప్రతినిధి కొండ మల్లేశం గౌడ్

మున్సిపల్ ఎన్నికలను బీసీలకు చట్టబద్ధమైన 42 శాతం రిజర్వేషన్లతోనే నిర్వహించాలని డిమాండ్ చేస్తూ చిట్యాల ఎమ్మార్వో విజయ మేడం కి బీసీ సంఘాల నాయకులు శుక్రవారం వినతిపత్రం సమర్పించారు.ఈ సందర్భంగా బీసీ విద్యార్థి సంఘం రాష్ట్ర కన్వీనర్ పల్లగొర్ల మోదీరాందేవ్, బీసీ యువజన సంఘం ఉమ్మడి జిల్లా కన్వీనర్ ఎడ్ల మహాలింగం మాట్లాడుతూ—ప్రభుత్వం ఎన్నికల సమయంలో ఇచ్చిన హామీల ప్రకారం కామారెడ్డి బీసీ డిక్లరేషన్ను అమలు చేసి మున్సిపల్ ఎన్నికలకు వెళ్లాలని కోరారు.బీసీలకు జనాభా ప్రాతిపదికన విద్యా, ఉద్యోగ రంగాల్లోనే కాకుండా స్థానిక సంస్థలు, మున్సిపల్ ఎన్నికల్లోనూ శాశ్వత రిజర్వేషన్లకు రాజ్యాంగ సవరణ అవసరమని వారు పేర్కొన్నారు. రాష్ట్ర రాజకీయాల్లో బీసీల ప్రాతినిధ్యం ఇప్పటికీ 14 శాతం దాటకపోవడం వారి రాజకీయ వెనుకబాటుతనానికి నిదర్శనమని వ్యాఖ్యానించారు.రాజ్యాంగంలోని ఆర్టికల్ 243-D(6) ప్రకారం స్థానిక సంస్థల్లో బీసీ రిజర్వేషన్లు నిర్ణయించే పూర్తి అధికారం రాష్ట్ర ప్రభుత్వానికే ఉందని తెలిపారు. ఈ అధికారం ఆధారంగా అసెంబ్లీలో ఇప్పటికే చట్టం చేసిన నేపథ్యంలో వెంటనే జీవో జారీ చేసి ఎన్నికలకు వెళ్లాలని విజ్ఞప్తి చేశారు.సుప్రీంకోర్టు అగ్రకులాలకు 10 శాతం ఈడబ్ల్యూఎస్ రిజర్వేషన్లు కల్పించిన సందర్భంగా 50 శాతం సీలింగ్‌ను సడలించిన విషయాన్ని గుర్తు చేస్తూ, ఇందిరా సహానీ కేసులో కూడా ఎంపిరికల్ డేటా ఉంటే 50 శాతం పరిమితిని అధిగమించవచ్చని సుప్రీంకోర్టు స్పష్టంగా తీర్పు ఇచ్చిందని పేర్కొన్నారు. కులాల వారీ జనాభా లెక్కలు, అసెంబ్లీ చట్టం ఉన్న నేపథ్యంలో ఈ కేసు న్యాయపరంగా, రాజ్యాంగపరంగా పూర్తిగా బలంగా ఉందని వారు అభిప్రాయపడ్డారు.కావున ఎలాంటి రాజ్యాంగ, న్యాయపరమైన అడ్డంకులు లేకపోవడంతో బీసీలకు రాజకీయంగా 42 శాతం రిజర్వేషన్లు కల్పించి మున్సిపల్ ఎన్నికలకు వెళ్లాలని ప్రభుత్వం తక్షణమే నిర్ణయం తీసుకోవాలని డిమాండ్ చేశారు.ఈ కార్యక్రమంలో బీసీ విద్యార్థి సంఘ రాష్ట్ర కన్వీనర్ పల్లగొర్ల మోదీరాందేవ్, బీసీ యువజన సంఘం ఉమ్మడి జిల్లా కన్వీనర్ ఎడ్ల మహాలింగం, మనీల్, రాజారాం తదితరులు పాల్గొన్నారు.